India Army officer atan Mizo tlangval tling thar

On Jan 5, 2026 1 0

India Army officer atan
Mizo tlangval tling thar
2025 December 29 khan UPSC chuan Combined Defence Services Examination (I) 2025 final result a tichhuak a. All India Merit list UPSC-in a tih chhuahah hian mipa 473 leh hmeichhia 62 an tling. Mipa 473 tling zingah Mizo tlangval Jacob Lalchhanhima chu 205-na a ni.
Jacob Lalchhanhima hi Ngurpuilura (L) leh Lalhmingliani Sailo te fa upa ber a ni a. Khatla Chawnga Road-a awm an ni. Class 8-12 chu Rashtriya Indian Military College Dehradun-ah a zir a. Hemi hnu hian Govt. Hrangbana College Aizawlah zir zawmin, kum 2023 khan BA (Pol.Sc) a zo.
Indian Army officer nih a tum avangin BA a zawh hnu hian Combined Defence Services Examination (CDSE) hmachhawn turin a inbuatsaih zui a, a tlin zui a ni. CDSE hmachhawn tur hian coaching a kal loa, amahin in atangin a inbuatsaih a ni.
CDSE paltlang tur hian UPSC buatsaih written examination paltlang hnuah Services Selection Board paltlang a ngai a. Chumi hnuah medical fitness test paltlang leh a ngai.
CDSE a paltlang hnu hian Officers’ Training Academy (OTA) Chennai-ah kar 49 (thla 11) a training anga, training zawhah Indian Army-ah lieutenant-a bul tanin officer hna a zawm dawn a ni.
MZP Gen. Hqrs. chuan Jacob Lalchhanhima hlawhtlinna chu a lawmpuiin a chhuang hle tih a sawi a. UPSC exam buatsaih hmachhawn tura bei mek Mizo zirlai tan chona thar siamtu a nih ngei a ring tih a sawi. Hetiang dinmun sang a thleng thei chu entawn tlak a tiin a kal zelna turah duhsakna a hlan tih a sawi bawk.