India-Canada ten high commissioner dah leh ve ve dawn
Canada-a Justin Trudeau-a kaihhruai sorkar liam tain India a puhna avanga ram hnih inkar a chhiat hle hnuah New Delhi leh Ottawa chuan an khawpui ve vea high commissioner dah leh turin an inrem leh ta.
Canada-a G7 Summit chhima Prime Minister Narendra Modi a tel rualin Canadian Prime Minister Mark Carney-a nen ‘tha tak leh hlawk taka’ an inbiak hnuah inremna hi an siam leh ta a ni.
Foreign Secretary Vikram Misri-a chuan Nilaini khan high commissioner dah leh hi ram hnih inkar tihthat lehna tura ‘rahbi pawimawh hmasa’ a nih thu a sawi.
“An inkawmnaah hian India-Canada relationship pawimawhna chungchang, a hlutna, dan hmanga kal leh mipui rorelna kalhmanga din, mi cheng ve ve inpoawhna leh thil dang danga inanna neihnate sawi chhuah a ni,” tiin Misri-a chuan video-a thuchhuah a siamah a tar lang.
India-Canada inkar hi palai hmanga siam that hret hret zui a ni dawn tih a sawi bawk.
Prime minister pahnihte hian kawng hrang hrang – sumdawnna, mi cheng inpawh theihna leh inbiakpawhnachungchangte pawh sawiin hei hi an inkar tihthat lehna tura rahbi pawimawh a nih thu an sawi.
India leh Canada inkar hi nikuma Ottawa-in Khalistan separatist inlak hran tum pawl hruaitu, Hardeep Singh Nijjar-a an rama thahnaah New Delhi a inrawlh nia a hriat thu a sawi hnuah a chhe hle a. India chuan a high commissioner leh palai dang panga ho hawin hetiang zat bawk Canadian palaite a hawtir bawk.
Misri-a chuan eng emaw chen an lo tawpsan tawh, sumdawngna kawngah pawh an inpawh leh theih nan indawr zui zel ni se an ti tih a sawi.
“Sumdawnna an tawpsan tawh pawh hruaitu pahnihte hian sawi dunin an hnuaia thawktute ve ve chu a hma thei anga hma la thar turin an ti,” a ti.
Canada pawhin Carney-Modi inbiakna chungchangah hian thuchhuah siamin Canada-India inkungkaihna chu inhriat thiam tawnna, dan tlawhchhan a ni tih a tar lang.
“Hruaitute hian high commissioner thar dah ve ve an remti a, khua leh tui leh sumdawnna pawh a hma anga kalpui leh ni se an ti a ni,” an ti.
Modi-a leh Carney-a te hian Indo-Pacific leh Canada leh India inkar sumdawnna pawh an sawi dun.
Nikum October thla khan Ottawa-in nikuma Nijjar-a thahnaa inhnamhnawih anga a puhna chu India hian phain an inkar a chhiat zui phah hle a ni.
Get real time updates directly on you device, subscribe now.