India economy thanna tur 6.5-7 percent beisei

India economy chu kumin financial year hman mek March 2025 a tawp hmain 6.5 atanga 7% inkarah a thang ang tiin Economic Survey 2023-25 chuan a tarlang a, Reserve Bank of India (RBI)-in growth rate 7.2% hnuaiah a awm ang a tih aiin a hniam zawk.
Thawhlehnia Union Budget pharh hmain Finance Minister Nirmala Sitharaman chuan annual report-a growth projection hi pharhna a nei a. Kum hmasa khan growth beisei chu 8.2% niin chu ai pawhin a hniam zawk a ni.
State of economy, Chief Economic Adviser V. Anatha Nageswaran leh a team tena Finance Ministry-a an siam chuan private investment lamah growth a tlahniam ang an ti bawk a.
“Tun hnai kum thum chhunga growth lama hmasawnna thlen hnuah private capital formation chuan ram dang atanga bungrua tlawm zawka chawkluh theihna asan avangin growth an hmu tlem zawk hret thei” tiin tarlan a ni a.
Phek 476-a chhah Economic Survey document chuan Indian economy chuan post-Covid recovery fiscal leh monetary lamah tha tak neiin chu chuan economic leh financial stability a thlen a ni tia sawiin economy chu a thang lian zel a ti bawk a.
Mahse, global volatility avangin thil inthlak danglam reng a awm lo thei lo tiin Survey document chuan a tarlang bawk a.
“Recovery mumal a taka a awm reng nan chuan ram chhungah thil thlak danglam a ngai reng a, a chhan pawh global issue pawimawh trade, investment leh climate lamah inremna awlsam taka siam mai a theih thin loh vang a ni” tiin Survey chuan a tarlang bawk.
Survey document chuan FY24 a economic growth sang tak awm theih chhan chu a hma financial year hnih a growth rate 9.7 percent leh 7.0 percent a a than vang tiin a tarlang bawk.
Financial year quarter hnuhnung berah khan current account chuan surplus a hmu bawk a. Foreign exchange reserve a tam tawk bawk a ti bawk.
National income data pawhin non-financial private-sector capital formation current price a teh chu FY22 leh FY23 ah nasa taka a than dan a tarlang bawk. Mahse, machinery leh equipment lama investment erawh a zawnin FY20 leh FY21 a tlakhniam huah chak takin a thang a ti bawk a. FY24 corporate sector data pawhin private sector a capital formation chu a lian zela mahse a muang thung a ti bawk.
Survey chuan China atanga foreign direct investment lut tam chuan India chu global supply chain ah nasa zawka inhnimluh tirin export tam zawk a thlen thei a ti bawk a.
Survey chuan India chuan global value chains (GVCs) ah nasa zawka inhnimphum tumin chumai bakah East Asian economies te hlawhtlinna leh strategy te chu uluk zawka a bih a ngai a ti bawk.
Heng economies te hian strategy pahnih nei tlangpuiin – trade cost tihtlem leh foreign investment pun theih nana hmalak a ni.
India chuan ‘China plus one’ strategy hmangin duhthlan tur pahnih a nei thei a, China supply chain a inhnimluh emaw China atanga FDI tihpun lam hawi a ni a ti bawk.
“Heng duhthla tur pahnihah hian China atanga FDI tihpun chu tha zawk leh India in US a export a neih tihpun theihna tur niin chutak chu East Asian economies te pawhin an lo tih tawh a ni,” tiin Survey, Nirmala Sitharaman-in parliament-a a pharh chuan a tarlang.
China plus one approach atanga hlawkna neih theihna tur chuan FDI thlan zawk chu trade-a innghah ai chuan hlawk leh tha zawka ngaih a ni, a ti bawk a. “A chhan ber pawh China chu India top import partner a ni a, China nena trade deficit a pung zel bawk. US leh Europe ten China an hnuchhawn zel karah Chinese company tena India a invest a, chuta an product te export zawk chu a tha zawk a ni” a ti bawk.
Survey chuan China atanga FDI tam zawk lut chuan India global supply chain a tihpun theih dan leh export a pun theih dan tur a sawifiah bawk a. Tun dinhmunah chuan China atanga FDI tur reng reng chuan sorkar remtihna lak hmasak phawt a ngai a ni.
Finance Minister Nirmala Sitharaman chuan budget pharh tamah Prime Minister hlui Morarji Desai, annual budget tum nga leh interim budget tum khat kum 1959 leh 1964 chuhnga Finance Minister nia a pharh chu a khum dawn a, tun hi Sitharaman in budget tum sarih a pharhna tur a ni.