India head coach ni thei tur mi pathum thlangchhuak phawt

India head coach ni thei tur mi pathum thlangchhuak phawt
All India Football Federation (AIFF) Technical Committee (TC) chuan Blue Tigers boss nih duha dilna thehlut mi thahnem tak zing atangin mi pathum a thlangchhuak a, he’ng shortlists pathumte atang hian an la buk leh dawn a ni.
Tunkar Nilaini khan TC hi thukhawmin, Senior Men’s Indian Football Team atana buk tur candidate pathum an thlang a, an zinga pakhat hi budget pan tak nena a hun laia Indian top flight hmachhawn Aizawl FC tana history siama I-League title lakpuitu Khalid Jamil kha a ni.
Tarlan tawh thin angin, India mipa team hi an chechhe rei ta fu a, Fifa ranking-a an aia hniam Hong Kong laka an tlawm hnu khan national team head coach Manolo Marquez chuan a hna a bansan a, club lama FC Goa a enkawl tel bawk avang khan national team-in an tuar tel ve bawkte pawh a ni mahna.
Manolo ban rualin India rama football coach hna lian ruak dilin mi 170 laiin application an thehlut a; TC lamin fimkhur taka a zirchian hnuah candidate pathum thlang phawtin, pakhat chu kan sawi tak Khalid Jamil hi a ni a, a dang leh chu India head coach hlui Stephen Constantine kha niin, pakhat dang leh chu Slovakia national team head coach hlui Stefan Tarkovic a ni.
India manager nih tuma dilna thehlut zingah hming hraw tak tak pawh an kat ve nuk a, chu’ng zingah chuan Liverpool star hlui pahnih Robbie Fowler leh Harry Kewell-te bakah ISL-winning tactician pahnih Antonio Habas leh Sergio Lobera te, I-League champion lo ni tawh pahnih Staikos Vergetis leh Andrey Chernyshov te, Indian coach hriat leh ngaihsan hlawh pahnih Sanjoy Sen leh Santosh Kashyap-te bakah Jamil ang bawka India international hlui Renedy Singh-te an ni.
AIFF Technical Committee shortlist pathumte hi han bihchiang ta deuh ila.
Tarlan tawh thin angin, Khalid Jamil hi hmarchhak club zinga I-League champion ni thei hmasaber Aizawl hlawhtlinpuitu a nihna khan a chawisang hle a, Aizawl FC a champion-pui kha Indian football chanchina beisei loh hlawhtlinna thawnthu ropui berte zinga mi a ni reng tawh dawn a ni.
Indian foreign coach rawih tawh zinga Blue Tigers chawisang ber tih hial theih tur Stephen Constantine-a hun lai khan India chuan Fifa ranking-ah top 100 a luah pha ve hial a, kha hlawhtlinna sang tak chanpuitu sap coach khan Indian team-a kirleh a duh a, engtiang taka buk rit nge a la nih zui zel dawn kan thlir ang.
Tarkovic hi Indian football fans zingah hriat a hlawh vak loin a lang a, Slovakia national team head coach a nih tawh bakah assistant coach leh technical director hnate pawh thawk tawhin, kum 2023 mai khan Kyrgyzstan national team manager a ni bawk.
Euro 2020-ah khan Tarkovic chuan hriat a rawn hlawh chho deuh a, a team enkawl Slovakia khan Poland an hnehna kawngah tactic awmze nei leh hrilh anga chet dan smart tak an pholang a, tah khan an boss-in fak a hlawh.
Tarkovic hian Slovak club hra wber ber MSK Zilina, Tatran Presov leh Kosice tihte a lo enkawl tawh a; national team-a a zinkawng chu kum 2013 khan assistant niin a tan.
Tunhnai lehzualah Kyrgyzstan head coach ni chungin history a siam a, a team enkawl chu 2027 AFC Asian Cup khel tura a tlinpui bakah a vawi khatna atan World Cup qualifiers third round thlenpuiin, nikum kum laihawl khan a bang zui ta a ni.
Technical Committee-in buk nawn leh tur a thlanchhuah mi pathumte atang hian Executive Committee chuan Blue Tigers head coach tur an thlangchhuak tawh dawn a ni.