India hockey squad thar an puang
Hockey India chuan Australia tour-a zinchhuak tur Indian Men’s Hockey Team member 24-te hming a tarchhuak a, ace dragflicker Harmanpreet Singh bawkin captain ni chungin team a hruai leh dawn.
Thawhtanni khan Hockey India chuan 24-member Indian Men’s Hockey Team-a tel tur player-te hming hi a tlangzarh a; August ni 15-21 chhung hian Perth khawpuiah India team hian match li an khel dawn a, hei hi August ni 29 atanga Rajgir, Bihar lama khelh tan tur Hero Asia Cup atana inbuatsiahna (exposure tour) niin, Asia Cup hi World Cup Qualifier a ni nghal.
Indian team captain tur defender Harmanpreet Singh kan hre tawh a; Krishan Pathak leh Suraj Karkera-te chu goalkeeper tura thlan niin, squad thara defender dang kan hmuhte chu Sumit, Jarmanpreet Singh, Sanjay, Amit Rohidas, Nilam Sanjeep Xess, Jugraj Singh leh h,el thar Karnataka player Poovanna CB-te an ni.
India captain hlui Sardar Singh nen hiala khaikhin hlawh pha der tawh talented young midfielder Rajinder Singh baka squad-a midfielder lang ve dangte chu Raj Kumar Pal, Hardik Singh, Manpreet Singh, Vivek Sagar Prasad, Rabichandra Singh Moirangthem leh Vishnu Kant Singh-te an ni a; forward line lamah Mandeep Singh, Shilanand Lakra, Abhishek, Sukhjeet Singh, Dilpreet Singh, Selvam Karthi leh Aditya Lalage-te hmuh tur an awm bawk.
Asia Cup atana Australia tour pawimawhna sawiin chief coach Craig Fulton chuan, “Bihar lama Asia Cup kan khelh tur atana intuaihriam turin Perth, Australia kan pan dawn a, kan tum ber tur chu quality training leh warm up match hmanga kan taksa tih fit leh thiam thil zirchhuah (technical execution) a ni ang,” a ti.
Fulton hian squad-a player naupang zawk a telh chhan sawifiah nghalin, player naupang zawkte tana chhuahvahna hun hlu tak buatsaihsak chu pressure hnuaia fiahna an hmachhawnna tur a nih thu a sawi a, India leilunga inelna an hmachhawn tur atan mimal leh team anga inbuatsaihna tur a nih thu a tarlang nawn leh.
Indian team hian Zirtawpni hian Sports Authority of India (SAI) campus-a training an kalpui mekna Bengaluru khawpui atangin Australia hi an pan dawn a ni.
Indian men’s hockey team
Goalkeepers: Krishan B Pathak
Suraj Karkera
Defenders:
Sumit, Jarmanpreet Singh
Harmanpreet Singh (C)
Sanjay, Amit Rohidas
Nilam Sanjeep Xess
Jugraj Singh, Poovanna CB
Midfielders:
Rajinder Singh
Raj Kumar Pal
Hardik Singh
Manpreet Singh
Vivek Sagar Prasad
Rabichandra Singh Moirangthem
Vishnu Kant Singh
Forwards: Mandeep Singh
Shilanand Lakra, Abhishek
Sukhjeet Singh
Dilpreet Singh
Selvam Karthi
Aditya Lalage