India-in a hrilh hnuah Pakistana mi nuai 1.5 vel insaseng
India-in a hrilh hnuah Pakistana mi nuai 1.5 vel insaseng
Pakistan chuan a thenawm, India-in tun hnaia ruah sur nasa lutuk avanga a tuikhuah a sah dawn tih a hrilh lawk hnuah luipui pathum, lo neihna hmun pawimawh taka cheng mi 1,50,000 vel chu hmun himah an sawn chhuak tih Thawhlehni khan thuneituten an sawi.
Ram inhal tak pahnihah hian tun hnaiah ruah a sur nasa hle a. Tuikhuah sah a nih hian Pakistan-a an ei leh in thar chhuahna hmunpui ber pakhat, Punjab province-ah tui a lian a thlen hlauhna a awm a ni.
Nuclear ralthuam nei ral hnih hi May thlaa an indo hnuah an inkar chhiat lai tak a ni a, tui a len leh phei chuan New Delhi chu a chhanah puihna hle tura ngaih a ni.
Pakistani thuneitute chuan India hnen atangin Thawhtanni khan Madhopur Dam a khah lutuk tawh avanga tui an sah tur avanga inring tura tihna vawi hnihna an dawng tih an sawi.
India-in inring tura a tih hma, Zirtawpni atang tawh khan insaseng an awm tawh niin Pakistan-a National Disaster Management Authority thupuangtu chuan a sawi.
August 14 atang khan hmun hrang hranga cheng mi 35,000 vel chu thil hlauhawm a awm thei nia ngaiin an lo insaseng tawh niin a sawi bawk.
Insaseng pui hian sipai an thawk chhuak bawk.
India hian a khât tawkin a tuikhuaha tui hi a sah fo va, Pakistan-ah a luang lut thin.
Indian sorkar chuan eng tuikhuah ber nge an sah dawn tih sawi lo mah se Pakistan hnenah hian inring tura tihna vawi hnihna a pe tawh a. A tul chuan a dang pawh an la pe dawn tih an sawi.
New Delhi hian Pathianni khan Pakistan hnenah hian inring tura tihna hmasa a lo pe tawh a ni.
Lui pathum – Ravi, Sutlej leh Chenab te hi Pakistan atanga India-a luang lut a ni a. Pakistani thuneitute chuan heng luite hi an lian viau hlawm tih sawiin Punjab leh Pakistan-a Kashmir-ah ruah a la sur belh dawn tih an sawi bawk.
Pakistani disaster management hotu pakhat, Mazhar Hussain chuan India hian tuikhuah a sah dawn a, lui pathum kama awmte an insaseng tih a sawi.
Deputy Commissioner Saba Asghar Ali chuan India nena an inrinaa Pasrur khawpui a tlawh hnuah khaw 16 chu tui len hlauhawm theihna a nih thu a sawi.
Ei tur, damdawi, inthiarna leh ni tin mamawhte chu relief camp an siamah an dah nghal tih a sawi a, mi 5,000 leh ran vulh 1,450 vel sawn an ngaih thu a sawi.
Pakistan-a hmarthlang hi tui lianin a tibuai nasa hle a, tun furah hian mi 799 thi an awm tawh.
Hmar lama Gilgit Baltistan-ah pawh vur a tui nasa a, chhim lama Karachi khawpui pawh kar hmasa khan tui lianin a tibuai.
Tun dinhmuna tui len hlauhawmna ber chu khawchhak lama Punjab province a ni a, hei hi Pakistan-a cheng mi maktaduai 240 zinga a zahve vel awmna a ni.
He province hi Pakistan-a thlai tharna hmunpui niin lui pathum kama lei tha laiah an thar tam hle thin.