India-in a man duh ber ber zingah Maosit hruaitu 15 la tel

India-in a man duh ber ber zingah Maosit hruaitu 15 la tel
India-a police leh venhim hna thawktuten mi a man duh ber ber (most wanted) zingah dan pawna hnawl, Communist Party of India (Maoist)-a an central committee (CC) member 15 vel an la tel.
Heng mi 15-te hi ram pawikhawiha chi hrang hranga che thinte niin an luman pawh Rs nuai 40 atanga vaibelchhia thlengin an ni hlawm.
Thawhtannia Bijapur-a thah tak, an hruaitu hlun tak, Sudhakar-a kha No. 16 a ni.
Most wanted man chu Ganpathy tia an koh, Mupalla Laxmana Rao niin CC member a ni a, general secretary hlui a ni bawk a. Ganpathy-a hi May 21-a thah tak, CC general secretary ni lai, Basavarju tia an sawi, Nambala Keshava Rao-a hma chiah khan general secretary a ni.
Hming lang zingah hian Kalpana tia an koh, Sujata-i pawh a tel a. Ani hi kum 60 chuang tawh, kum 2011-a West Bengal-a thah tak, Maoist hruaitu, Kishen-a nupui a ni.
Venhim hnathawktute an hriat dan chuan Sujata-i hi CC member la niin South Bastar Divisional Committee in charge a ni bawk a. Police chuan a lumanah Rs nuai 40 an chhiar a, state dang thenkhatin a luman an chhiarte nen Rs. veibelchhe 1 vel luman a nei.
“CPI (Maoists) hian central committee member 24 chuang neiin an hruaitu lawk ber ber an ni a. An party tana ngaihtuahna hmangtu niin military wing an awm bawk a. Tunah chuan heng mite hi 15 chauh an ni tawh a, thenkhat chu ramhnuai chhuahsanin an kum a upat ve tawh avangin an hnuhma thupin nun pangngaia nung pawh an awm a. Chhattisgarh bikah CC member pali nga vel an la awm,” tiin thuneitu sang pakhat chuan a sawi.
Man duh ber pahnihna chu Abhay tia an koh, Mallojula Venugopal a ni a, ani hi politburo member leh Basavaraju-a thlaktu tura rinkai a ni.
“Abhay-a hi kum 60 chung lam tawh niin Chhattisgarh-ah awmin an thupuangtu a ni tel a. CC member tho, Chandranna tia koh, Puluri Prasad Rao nen an general secretary thar tura rinkai an ni,” tiin hotu sang chuan a sawi.
Thla hmasaa Basavaraju-a thah a nih hnuah an party hian an hruaitu thar thlang turin inhmuhkhawm an la ko thei lo niin a sawi bawk.
“CPI Maoist hruaitute hi an tlem zel a, kum tam vak lo kal taa 45 vel ni thin kha tunah chuan 14 chauh an ni tawh,” tiin Bastar range IG P Sundarraj-a chuan a sawi.
CC member man duh 15 zinga a naupang ber chu kum 52 mi, Madhvi Hidma a ni a, armed cadre hruaitu a ni a. “Hidma bakah , commander of PLGA Battalion No. 1 commander Barse Deva leh Company No. 1 commander Dulla te hi an la naupangin an la chak tha a, inpek duh lova beitu an la ni a. Sipai lama Maoist chakna bul an ni mek,” tiin thuneitu pakhatin a sawi.
Sunirmal tia koh, Misir Besra leh Chetan Deoji, kum 60 chuang ve ve, Maoists Central Military Commission (CMC)-a telte hming pawh a lang a. Besra hi CMC member niin Deoji hi secretary a ni a. CMC hi Maoist-a venhim hna thawktu beihna ruahmanna siamtu ber an ni.
Kuminah hian CC member pathum vel thah an ni tawh.