India-in a mite Iran chhuahsan turin ti, Iranian FM-in Jaishankar bia

India-in a mite Iran chhuahsan turin ti, Iranian FM-in Jaishankar bia
Iran-a mipuiten lungawi loh an lantirnaa tharum thawhna nasa taka thleng mek karah India chuan he rama a mi awmte chu chhuak thuai turin a ti a. Hetih lai hian Iranian Foreign Minister Seyed Abbas Araghchi-a chuan Nilaini zan khan Indian External Affairs Minister (EAM) S Jaishankar-a chu phone-a biain an rama thil thleng mek ‘inlumlet dan’ a sawipui.
“Iranian Foreign Minister Seyed Abbas Araghchi-a hnen atangin phone call ka dawng a. Iran-a an thil tawn mek leh thil thlengte kan sawi dun a ni,” tiin Jaishankar-a hian X-ah a tar lang.
New Delhi chuan Nilaini tlai khan Iran-a awm mek Indian-te tan inkaihhruaina a tichhuak a, India atanga zin rih lo tura mipui ngenna a tichhuak bawk a. Hemi hnu lawkah hian hruaitu pahnih hi an inbia a ni.
“Iran-a thil thleng mek avangin Indian-te chu thu leh a awm hma chu Islamic Republic of Iran-ah zin rih lo hram turin kan inngen a ni,” tiin Indian sorkar hian hriattirna a chhuah.
Kar hmasa Thawhtanni pawh khan sorkar hian Indian-te chu tul bik thil tak a nih loh chuan Iran-a zin rih lo turin a lo ngen tawh a, tunah boruak inlumlet nasa zawk awm thar mek zel karah ngenna thar a tichhuak leh ta a ni.
“Iran-a Indian khua leh tui leh PIO awm mekte pawh beng chhi reng tura chah an ni a, a theih chen chenah lungawi loh lantirna hmunah kal lo turin kan inchah a, Tehran-a Embassy of India website leh social media-ah thil thleng leh thu tharte ngaihven reng turin a ni,” tiin Ministry of External Affairs (MEA) chuan hriattirna a chhuah a ni.
“Iran-a cheng tura visa nei Indian-te chu Indian Embassy-a inziak lut vek tura beisei an ni a, la ti lote pawhin ti thuai turin kan chah a ni,” an ti bawk.
Iran-ah hian khawpui hrang hrangah mipuiten sorkar lakah lungawi lohna lian tak lantir mekin tharum thawhna pawh a nasa a, mi tam tak thah an ni tawh a, man leh hliam tuar pawh sangtel an awm tawh bawk.
US pawhin Thawhlehni khan a khua leh tuite chu ‘a rang thei anga bera Iran chhuahsan turin’ a lo chah tawh a. Lirtheiin Armenia emaw, Turkey emaw pan nghal turin an ti a ni.
Iranian mipuite hian an eibar dinhmun chhe lutuk leh an pawisa hlutna hniam lutuk avangin sorkar lakah lungawi lohna hi chawlhkar hnih liam ta atang khan an lantir a. Rei lo te hnuah puithiam rorelna hnuaia awm duh lohnaah chang zuiin sorkarin hmeh mih tumin tharum hmangin a bei a, mi 2,000 chuang thi an awm tawh.
Sorkar chet dan avang hian US chuan beihah a vau a, Tehran chuan Washington-in a kah vaih chuan an bul hnaia American hmunte beih letah a vau let ve bawk a ni.