India-in Armenia hnenah ralthuam thawn dawn

The Economic Times-in a sawi danin India chuan Caucasus ram zinga a thian tha tak Armenia hnenah ralthuam tam zawk pek a tum thu a sawi.
Heng ralthuam a pek tum zingah hian Armenia tluchhe thei mai tur ven nan lawng hmanga ralthuam bungraw chi hrang hrang thawn luh sak te a ni.
He thutlukna hi Armenia leh Azerbaijan inkara inhmuh thiamlohna thleng mek denchhena siam niin Azerbaijan hi Pakistan leh Turkey ten an thlawp a ni.
Helai dinhmun hrechiangtu takin Economic Times a hrilh danin Armenia sorkar-a thuneitu sang tak chuan hmanni lawk khan New Delhi tlawhin hemi chungchang hi an sawiho a, mahse an sawihona chipchiar chu puanzar a nilo a ni. India hian nikum khan hlawhtling takin a ralthuam te armenia hnenah a lo thawn tawh a ni.
India hian lawng hmanga Armenia hnena ralthuam a lo thawn tawh te zingah rocket kah chhuahna Pinaka te, Tank kah chhiatna leh a mu te a tel a ni.
Heng ralthuam bungrua a thawn luh te hi Iran ram kaltlanga pek a ni a, Iran leh Armenia te hi hun rei tawh tak atanga inthian tha tak niin hei hian Azerbaijan atanga dodalna a nasa hle a ni. India, Iran leh Armenia te hian inkalpawh tawnna tha siam tumin kumin kum bul lam khan ram pathumte inkarah inthian thatna tha tak an lo siam tawh a ni.
Kumin April thla khan ram pathum te hian Armenian khawpui Yerevan-ah inhmuhkhawmna an lo nei tawh a, heng ram pathum te hian economic chungchanga bul tan dan tur te, in biak pawh tawn dan tur te leh hnam chin dan phung thuk zawka inzir chian tawn sakna leh mipui te inlaichin tawnna neih dan tur te sawiho niin heng inremna chhung atanga inrawnkhawm zel an remti a ni.
Heng bakah hian ram pathum aiawhte inhmukhawm hian International North-South Transport Corridor (INSTC) chu ram pathum te phuar khawmna bul tan nan hman tangkai theih a nih dan tur an zir chiang a ni. Armenia hian India chu ralthuam a mamawh bikte siam nan innghahna hnar berah hman a tum a ni.