India-in Bangladesh nena inkar siam that duh
India-in Bangladesh nena inkar siam that duh
India chuan Bangladesh-a sorkar thar a din leh hnuah inkungkaihna siam thar leh a duh hle tih Dhaka-a Indian high commissioner Pranay Verma chuan a sawi.
Verma hian Pathianni khan Bangladesh-a foreign minister thar, Dr. Khalilur Rahman leh minister of state thar, Shama Obaed Islam te chu Bangladesh foreign ministry-ah a kawm.
“Foreign minister lej minister of state tharte ka kawm a, inkawmna hlawk tak niin kan ngaihdante kan inhrilh tawn a ni,” tiin Verma chuan an inkawm zawha thuthar la khawmtute a kawmnaah a sawi.
“Bangladesh inthlan hnua sorkar hotu liante inbiak zuina in ngaihven tih ka hria a. February 13-a inthlan zawh hnu lawk khan prime minister-in Pu Tarique Rahman-a lawmpuina a thawn nghal a. Phone-in an inbe zui bawk a. February 17-ah sorkar thar lak luh a ni a, Lok Sabha speaker-in Dhaka tlawhin lak luh inkhawmah a tel a. Prime minister thar pawh a hmu a, Prime minister Modi-a’n Prime Minister Rahman-a zin tura a sawmna pawh a pe a ni,” a ti.
Indian palai hian India chuan Bangladesh nena inkungkaihna siam thata thawh hona tihchak a duh tih a sawi bawk.
“Hetianga inbiakna zawng zawng hmang hian Bangladesh nena kan inkar tihthat hi kan duh a. Bangladesh-a mipui rorelna, thanna leh kal zelna hi tha kan tiin kan thlawp em em a ni,” tiin Verma chuan a sawi.
“Vawiina foreign minister nena inkawmnaah hian Bangladesh nena inkungkaihna siam thatna tur kan duh tih thlen a ni a. Mihring inpawhna, a tha zawnga thawhho zel, hma lam thlir zel leh inhriat thiam tawhna ang zela kal ni se kan duh a ni,” tiin Indian high commissioner chuan a sawi.
February 18-a Dhaka-a Rahman-a sorkar lak luh inkhawmah khan Lok Sabha Speaker Birla kha telin Prime Minister Modi-a’n a hma thei ang bera India thawh tura a sawmna a pe.
Birla hian Rahman-a lawmpuina hlanin India chu Bangladesd-in mipui rorelna tun din a tumna, hmasawn a tumna leh ram khat a nihna vawn him tuma a beihna a thlawp em em tih a hrilh a. India-in inthenawm ram hnihte inkara inthian thatna a awm theih a duh reng tih a sawi bawk.