India-in damdawi thawn nan Russia, Netherlands leh Brazil thlithlai

India chuan a damdawi siam chhuahte chu Russia, Netherlands leh Brazil tam zawk thawn chhuah tumin hma a la niin industry pahnihin an sawi a, hei hi a leisaktu lian ber ni mek, US nen an inkara sumdawnnaa neuh neuh a awm mek laia tih a ni.
India-a damdawi siamtute hi President Donald Trump-a’n tariff 50% a laksakah an tel ve lo va; mahse, thil chiang lo tam tak awm karah an tawrh ve hun thleng mai thei reng a ni.
US hi India-in damdawi a thawn chhuah hmuh thuma thena hmun khat aia tam leisaktu a ni mek a, damdawi langsar tak takte hi man tlawm zawkin a thawn chhuak thin a. Kum 2024-24 chhung khan US-a a thawn bik hi 20%-a pungin $ tluklehdingawn 10.5 man vel a tling.
“India hian hmun danga thawn chhuah tihpun a duh a, Russia, Brazil, Netherlands leh Europe hmun thenkhat hi remchang thei dawn nia hriat a ni,” tiin Reuters chuan a thudawn a tar lang.
“Hei hi huang zauhna leh ram tam zawka inzawrhna kawng hawnna tur atana hmalakna a ni,” an ti bawk.
United Kingdom chu India damdawi lei tam ber dawttu niin $ maktaduai 914 man a leisak a, Brazil-in dawtin $ maktaduai 778 man a lei.
Netherlands leh Russia ramten $ maktaduai 616 leh $ maktaduai 577 man an leisak bawk niin Indian sorkarin a chhinchhiahnaah tar lan a ni.
India-a damdawi siamtute chuan thawn chhuah tam zawkna tur thar an ruahmana an thawn theih chuan 20% velin an hralh tam zawk dawn nia chhut lawk a ni.
Hralhna thar an neih tur hian US atanga hralhna man an hmuh erawh a thlak dawn lo va, ‘leisaktu tur thar’ an nei dawn tihna chauh a ni zawk niin mi thiamte chuan an sawi.
India hian New Delhi-a International Pharmaceutical Exhibition a thlen mai turah damdawia sumdawnna kawnga huang zauhna tur hi a dap ngei rin a ni a, he hunah hian khawvel huapa damdawi khuahkhirhtute pawh an tel dawn.
“Zan khat thilah kan thawn chhuak tam thut ngawt thei lo va, hei vang hian hmabak a la awm a, chu chu heng rama miten a hman theih leh theih lohvah thu an tihtlukte a la ngai a ni,” tiin Reuters thu lakna chuan a sawi.
Indian sorkar hian UK nen free trade agreement an siam hnuah damdawi siamtute chu tam zawk an thawn theihna tur erawh a sawipui tawh.