India in final an lut
Cricket World Cup 2023 khelh mek chu November 15, Nilai zan khan Mumbai khawpuia Wankhede Stadium-ah semi-final hmasa zawk khelh a ni a. Inkhel hmuhnawm takah inelna thlengtu India hian New Zealand an hneh nawn leh a, final an lut.
Semi final hmasa zawkah hian toss a chak India in vuak hmasak an thlang a, an tisual lo. Inelna neih mekah la chak vek awmchhun India hian Over 50-ah run 397 an siam a, mi pali chiah out in, target hautak tak an hnutchhiah. India tan hian Virat Kohli a chetha leh viau a, ball 113 a hmachhawn atangin run 117 set a siam. Kohli hian one day international-a century siam ngun ber record thar a siam ta hial a, One day international-ah Cricketer ropui Sachin Tendulkar-a’n century siam tam lama record a lo siam tawh vawi 49 chu a tlan pel ta chiah a ni.
Kohli a chet that bakah hian Shreyas Iyer a chetha viau bawk. Iyer hian ball 70 a hmachhawn atangin run 105 lai a siam a, hei hi ODI-ah century a puitlin ran ber tum a ni nghe nghe. Kohli leh Iyer ten century an siam ve ve bakah hian Shubman Gill chuan ball 66 a hmachhawn atangin run 80 a siam a, out lovin a ding tluan.
India in target hautak an siam um turin New Zealand in an vaw tan a, an che chhe hran lo. Daryl Mitchell chuan ball 119 a hmachhawn atangin run 134 a siam a. Kane Williamson chuan ball 73 a hmachhawn atangin run 69 a siam ve bawk. New Zealand tana vaw tantuten chetha thawkhat mah se an out hnuin an buai zui a, siam siam tam thei an awm zui tawh lo. India tana ball vawmtute leh ball vawtute an chetha tlang hle a, over 48.5-ah an khingpuite an out fai vek a. India hian round bobin match-ah wicket lia an lo hneh tawh New Zealand chu run 70 in an hneh zui leh a, final an lut ta a ni.
Cricket World Cup 2023 semi-final hnuhnung zawkah Australia leh South Africa an inhmachhawn a. Anni inkhela chak zawk zawk hi India nen an inhmachhawn zui leh ang.
Semi-final hnuhnung zawk hi ningani zana khelh tura ruahman a ni a. Khaw awm danin a zir lova, an khel zo zo thei lo a nih chuan South Africa tan final luh theihna kawng zau zawkin a inhawng thei dawn. South Africa leh Australia hi group match ah India in an lo hneh ve ve tawh.