India-in $ mtd 680-a Mauritius a puihna tur inremna siam

India leh Mauritius chuan New Delhi-in eibara puihna tura a pek, $ maktaduai 680 hnuaia project kalpui turin Ningani khan inremna an siam a, External Affairs Minister S. Jaishankar-a leh Mauritius Prime Minister Navinchandra Ramgoolam-a te inbiain kawng hrang hranga thawh dunna tihchak dan tur an sawi dun bawk.
Port Louis-a chanchinbu mite an kawmnaah hruaitu pahnihte hian Asia khawthlanga buaina avanga buaina chhuak nasa tak karah Mauritius-in energy-ah tlakchham a neih loh nana India-in tuialhthei leh boruakalhthei a thawn thin chungchanga sorkar leh sorkar inremna tihfel mek a ni tih an sawi a,
Hruaitu pahnihte hian India-in a puihna, special economic package hnuaia hmalakna hrang hrangah inremna siam a nih thu an sawi a, hei hi nikum September thlaa Ramgoolam-a’n India a tlawh tuma puan kha a ni a. Package-ah hian budget-a suma puihna telh tur $ maktaduai 25 leh project eng emaw zat thawh sak leh puktir anga kalpui tur a awm a ni.
Jaishankar-a chuan package hian India-in Mauritius-a hmunhma, hriselna leh himna tihhmasawn a tumna a tilang tih a sawi a. Delhi chuan Mauritius-ah ram venhim hna thawktute a dah dawn tih a puang bawk.
Hruaitu pahnihte hian India-in a puihna hnuaia thawh tur khawtlang hmasawnna project 11, hmasawnna daih rei chi siamna, energy, infiamna leh hmunhma siama hmalakna hrang hrang an hawng a, Mauritian sorkar hnathawkte training pekna tur, ‘Karmayogi portal’ an hawng bawk a. Hei hi India-in a thawhpui ramtea rorelna leh inrelbawlna tihchakna tura hetiang project a kalpui hmasak ber a ni nghe nghe.
India-a University Grants Commission leh Higher Education Commission of Mauritius te thawhhona tur pawh tihfel a ni a. Mauritius chuan hydrography lama ram pahnihte thawhhona hmanga siam nautical chart hralhna tur royalty check $45,000 a hlan.