India-in Pakistani tan a chung boruak a khar chhunzawm

India-in Pakistani tan a chung boruak a khar chhunzawm
India chuan Thawhlehni khan a ram chung boruaka Pakistani thlawhtheihnate thlawh a khap chu August 23 thlenga kalpui turin a pawt sei.
Union Minister of State for Civil Aviation Murlidhar Mohol chuan, “Notice to Airmen (NOTAM)-in Pakistani thlawhtheihnate Indian boruaka an thlawh khapna chu August 23, 2025 thleng atan a pawt sei,” tiin X-ah a tar lang.
“He pawh seina hi thil pawimawh bik avang leh himna atana tih a ni a, chanchin thar kan ngaichang zel dawn nia,” tiin minister hian a tar lang bawk.
India-in a chung zawna thenawm ram thlawhtheihna thlawh a khap hma hian Pakistan-in Indian tan khapna a lo tichhuak hmasa zawk tawh.
Pakistan Airports Authority (PAA) chuan kar hmasaah tawh khan Indian thlawhtheihnate an chung zawna thlawh a phal lohna hi thla khat dang, August 24 thleng atan a pawh sei thu a lo sawi tawh a ni.
Hetih lai hian NOTAM hian Indian Air Force (IAF)-in Rajasthan-a India-Pakistan ramri hrulah July 23-25 chhung hian nunchan lian takin an zir dawn tih a sawi bawk a. Barmer atanga Jodhpur huam chhung thlengin an che vel dawn a ni.
Heng lai hmun hi Operation Sindoor kalpui lai khan Pakistan-in drone leh missile a thawn luh tamna ber lai a ni a. Drone tam takin Rajasthan-a Barmer, Jaisalmer, Bikaner leh Sri Ganganagar district te an bitum a ni.
NOTAM hian tun hma lama Pakistan leh India inkar a chhiat changin mihring phur thlawhna chet velna hi a lo thunun tawh thin a. Vansanga indona a chhuaha mihring him zawkna atana tih a ni.
April 23 khan Jammu & Kashmir-a Pahalgam-ah mi firfiakten mi 26 an that a, hei hi India chuan Pakistana-a awm firfiak pawl tihah puhin Operation Sindoor tia hming vuahin May 7 khan Pakistan ram chhunga firfiakte awmna hmun a kap a, Islamabad pawhin chhang letin inkahhai puang tawh mah se ram pahnih inkar hi a la khi nasa hle a ni.