India-in Russian thil a lei tlem telh telh ang – US Treasury Secy

India-in Russian thil a lei tlem telh telh ang – US Treasury Secy
India-in Russian tuialhthei a lei tlem tial tial dawn niin US Treasury Secretary Scott Bessent-a’n Nilaini khan television-a an kawmnaah a sawi.
Bessent-a’n hetiang a sawi mek lai hian an ram leh India hi Delhi-in Russian tuialhthei leh boruakalhthei a leisak avanga an inrem lohna tifel tur leh sumdawnna inremna an neih theih nan an indawr mek zel.
“President Donald Trump-a’n Russian tuialhthei an lei thin avangin India hrem nan chhiah 25% a lak belh a. India hian zawi zawiin a thil lei hi a titlem hret hret turah ka ngai a ni,” tiin Bessent-a hian Fox News-in an kawmnaah a sawi a, European ramten India-in a thlitfim sa an leisak a sawisel zui bawk.
Bessent-a’n hetiang a sawi mek lai hian Indian External Affairs Minister S Jaishankar-a chuan New York-ah US Secretary of State Marco Rubio-a a hmu a. State Department thuneitu sang pakhat chuan an inkawmnaah hian India-in Russian tuialhthei a lei chu an thil khel langsar ber niin a sawi.
India hian Russia thil a leisak avangin US-in a hrem nan an ram bungrua a lak luhah chhiah 50% a laksak a, heng zinga a zahve bik hi Moscow nena indawrna an neih vanga a hremna a ni.
US thuneitu sang hian indawrna kal mek zelah khawi lam ve ve pawhin ‘thil titha turin’ hma an la a, chawlhkar rei lo te hnuah chuan an inkara khi awm mek hi chin felna a awm thuai a beiseiawm hle tih a sawi.
Trump-a’n India-a an ram lailai ni tura a ruat, Sergio Gor-a pawhin September thla tir khan Senate Foreign Relations Committee-ah inchin felna a thlen thuai a beiseiawm tih a lo sawi ve tawh bawk.
US thuneitu sang hian Washington-in India hi Russia atanga a thil lei a tihtlem an duh a, engmah a leisak loh chu an duh ber a ni bawk tih a sawi.
Washington hian European ram leh G7-a a thawhpui ramte pawh Russia hrek tur leh Moscow atanga tuialhthei lei ram dangte pawh hrek tel turin a duh a. Hrek tura a duhna hian Russia-in Ukraine a rûn meka a lamtang, China pawh tariff 50-100% laksak pawh a huam.
“China leh India hi Russian tuialhthei lei tam an nih avangin indonaa Russia sum hnar ber an ni a, chhuanlam turin Nato ramten Russian energy leh an energy product an lo lei ve zel a, hei hi chawlhkar hnih kal taa ka hriat chauh kha a ni a, ka lawm lo hle a. Indonaah anmahni bei zawngin an che tihna a ni,” tiin Trump-a hian Thawhlehnia UN General Assembly-a thu a sawinaah a sawi a ni.
“Russia hi indo titawp tura a inpeih lo a nih chuan US hi na taka tariff hmanga hreka thisen luanna titawp turin a theihtawpin a inbuatsaih dawn a. Tariff sang lak hian awmzia rang takin a nei turah ka ngai a, he hmuna awm ve European ramte pawh hetiang hrekna ang bawk hi kalpui ve turin ka sawm a ni,” a ti.