India in Semi-final an lut

Cricket World Cup khelh meka inelna thlengtu India an chetha tluang zel. India hian ninga zana an khingpui Sri Lanka chu run 358 teh rengin an sawp. World Cup-a hnehna sang ber changtu India hi vawi sarih an chak zawn tawh a, semi-final an lut.
Mumbai a an thenawm ram Sri Lanka an hmachhawn tumin India hian an vaw hmasa a, an khel tha hle. India tan hian Shubman Gill chuan ball 92 a hmachhawn atangin run 92 a siam a, India tana run siam hnem ber a ni. England laka beisei phak lo Virat Kohli pawhin ngai a awh chho ve leh a, ball 94 a hmachhawn atangin run 88 a siam ve bawk. India batman zingah Shreyas Iyer a che tha viau a, ball 56 a hmachhawn atangin run 82 zet a siam. India hian over 50-ah run 357 zet an siam a, mi pariat an out.
India in an vuak zawh hnuin Sri Lanka in an vaw zui ve leh nghal a, targer hautak tak nei Sri Lanka hian India bowler te an ngam lova, an out nghal zawt zawt. Sri Lanka tana run siam hnem ber Kasun Rajitha chuan ball 17 a hmachhawn atangin run 17 bak a siam thei lo. India ball vawmtute ngam lo tak Sri Lanka hi Over 19 leh ball pali-ah an out vek a, run 55 bak an siam thei lo.
Hma takah an khingpui ball vawtute an vawm out vek vangin India in hnehna lian an chang a, an khingpuite hi run 358 teh rengin an sawp. India bowler Mohammed Shami chuan mi panga vawm out in, run 18 chiah a pe a, a che tha hle. Run 358 zeta chak India hian World Cup-a an chak chian ber tum an tawng a, hnuhma thar an hnutchhiah. India lakah chiang zeta tlawm Sri Lanka hian One day international-a run siam tlem ber hnuhma chhe tak hnutchhiah theihna chu run 17 in an pumpelh thei hram a, an mualpho thui lutuk ta lo hlauh.
Sri Lanka lakah an chak leh tak vangin India hi World Cup khelh mekah vawi sarih an chak zawn ta a, point 14 hmuin hmahruaitu an ni a, semi-final lut hmasa ber an ni nghal bawk. Hetih lai hian India in an sawp Sri Lanka hian vawi sarih khel tawhin, point li chiah an la hmu a, pa sarihnaah an awm mek. Semi-final lut turin an dinhmun a chhe viau rih.