India-in US-a a palaite venhimna tha zawk pe turin thlen tum

India-in US-a a palaite venhimna tha zawk pe turin thlen tum
US khawpui, Washington DC-a Israeli embassy-a thawk pahnih thah an nih hnuah India chuan American thuneitute hnenah an khawpuia a palai leh embassy chu venhimna tha zawk pe turin a ngen dawn niin hemi lam hria thuneitu sang chuan Ningani khan a sawi.
He thil hi sorkar chuan a ngai pawimawh hle a, June thla tirah hian party tin aiawh telna team, Congress MP Shashi Tharoor-a kaihhruai chuan Washington hi an tlawh nghal dawn a. India mi pawimawh leh sorkar chhawrte tana Khalistani inlak hran tum pawlten hlauhawm dante an thlithlai nghal dawn nia sawi a ni.
“Kan palaite himna hi a pawimawh tak zet a. Israeli embassy-a thawk mi pahnih chunga vanduaina a thlen hnuah phei chuan hmalak dan tur ngun lehzuala ngaihtuah nghal a ni,” tiin sorkar hotu lian pakhat chuan a sawi.
All-party delegation-in US an tlawh tur hi New Delhi sorkarin khawvel huapa Pakistan-in firfiaka chetna a thlawp dan pho chhuah a tumna leh Islamabad-in a thunun hmuna helho laka Operation Sindoor a kalpui sawi fiah tura beihpui a thlakna pakhat a ni bawk.
Nilaini tlaiah khan Israeli embassy-a thawk pahnih, Yaron Lischinsky leh Sarah Lynn Milgrim te chu Washington DC-a Jewish museum tualah mipa pakhatin a kap hlum niin police chuan an sawi a. A thattu nia an puha an man, Elias Rodriguez-a hi, “Free, free Palestine” tiin a au nghe nghe niin an sawi.
External Affairs Minister S Jaishankar chuan Israeli palaite thah an ni hi a dem thu social media-ah a tar lang a. “An chhungte leh an thawhpuite kan tawrhpuiin kan tawngtaipui a. A titu hian a phu tawk hremna pawh a hmu ngei tur a ni,” a ti.
Kar tin thuthar lakhawmtute a kawmnaah external affairs ministry thupuangtu, Randhir Jaiswal-a chuan, “He thil hian min barakhaih hle a, kan dem tak zet bawk a. Hetiang thil rawng leh rapthlak titu hi hremna pek ngei tur a ni a. Ram palaite himna leh vennna hi thil pawimawh tak a ni,” tiin a sawi.
US leh Canada-ah hian Sikh inlak hran tum pawl, Khalistani an tihte an awm nual a. Hengte hian India atanga indana Sikh mite tana ram hran neih tumin ram dang atangin an bei nasa a, heng ram hniha India mi pawimawhte himna tiderthawng theitu nia ngaih an ni.