India-in US Dollar Tluklehdingawn Khat hnawl

China rama motor car siam chhuaktu company lar tak BYD Co.’s an tih chuan India chu thawhpui ah sawmin India ramah Electric Vehicle (EV) siamna hmun dina thawk dun tur leh hemi atana US Dollar tluklehdingawn khat senso an tum tur thu te a sawi a, mahse hei hi India chuan a hnawl thu dawn a ni. Hyderabad-based Negha Engineering and Infrastuctures Ltd. leh BYD te thawhdun na tur ruahman hi ram venhimna chungchang avangin sorkar chuan a hnawl ni a ngaih a ni. Motor leh lirthei lam chi ah foreign direct investment ti turin a hranpa a phalna neih kher a ngailo thin a, mahse China chu India nena ramri thui tak intawm leh buaina neuh neuh nei an nih avangin ram himna leh politics thil ah Home leh External Ministries te phalna neih hmasak a tul thu sawi a ni.
BYD lam pawhin engmah an sawi duhlo a. Kum 1989-a lo din tawh Megha Engineering and Infrastructure Ltd. te pawhin BYD te hi phone call emaw email emaw pawhin an chhang let biiklo a ni. Finance Ministry, Heavy Industry Ministry leh Ministry of Home Affairs aiawh thupuangtu te chuan BYD atanga rawtna leh sawmna lo kal te hi sawiho tura rawtna a awmloh thu an sawi a ni.
India leh China ten ramri hrula buaina an neih leh thihna hial a thlen atang khan India chuan China atanga Investment neih reng reng a khuahkhirh tlat tawh a. Great Wall Motor Co. pawhin mothballed General Motors Co. lei a tum pawh phalna a hmuh mai theihloh avangin an lo inremna pawh a sukuk zo ta a ni. Central sorkarin BYD te sawmna leh rawtna a hnawl thu hi The Economic Times chuan inrinni khan a lo chhuah tawh a ni.