India junior women’s hockey team
tlawm ni herchhuak ve ta nge nge
Lionel Messi leh Angel di Maria-te khua Rosario-a Four Nations tournament khela fehchhuak Indian junior women’s hockey team chuan kartir Thawhtanni khan a thlengtu Argentina hneh loin tournament an khar.
Mizo tleirawl pahnih PC Lalrinpuii (Hnahthial) leh Lalthantluangi (Kanghmun South) telna India team hian South America khawmualpuiah hian an tumpui an hneh chho zat zat a, tournament thlengtu Argentina ngei pawh hi karliamta Nilaini khan hun pangngaia 1-1 a nih hnu penalty shootout-ah Mizo tleirawl pahnih goal thun hmangin sihnih faiin an lo sawp tawh a, mahse, Thawhtanni khan tournament hmawrbawknaah a thlengtu team nen hian an intum nawn leh a, 2-4-in India tleirawl team an tlawm ve ta thung.
He inkhela India goal hnih hi Kanika Siwach (11th minute, 45th) thun ve ve niin, he mi hma hian Argentina tan Sol Guignet Gunazu (5th) leh Sol Ollala De Labra (7th)-te’n sihnih faia mualneitu team hmahruaina goal an lo thun hman a ni.
Kanika goal hmasa zawk luh hnu lawk minute 13-naah Argentina lam hian Milagros del Valle Alastra tiangkawm hmangin an goal phai an chhungkhat leh nghal vat!
Chutah an la duhtawk lo a, Maxima Duportal chuan minute 37-ah an goal lina a thawh ve leh a, a thlengtu branch tlawmngai tawngkhawng tankhawh hi a na thawkhat hle a ni!
India erlet tan tun tournament-a chetha langsar tak Kanika chuan an siphurh pakhat sut leh bawk mah se Argentina lam hian huaisen takin final quarter an khel a, mikhual team laka an tlawm tawhna an chhanglet.
India team hian tun Pathianni liamta mai khan an match nganaah penalty shootout hmangin Uraguay an lo hneh tawh bawk a ni.
He game-ah hian Lalrinpuii leh Lalthantluangi an chetha leh a; hun pangngaiah Hnahthial tleirawl Rinpuii’n goal khat a khung a; penalty shootout lamah Kanghmun South tleirawl Thantluangi goal hmuh tur a awm ve bawk.
India hian bul an tan thain, an nawr na nghal hle a; first quarter minute 10-na lekah vice captain Hina chuan India goal hmahruai thawhin, second quarter minute 24-naah Lalrinpuii goal hmuh tur a awm chhunzawm ve nghal.
India hian third quarter thlenga sihnih faia hma an hruai hnuin 4th quarter-ah Uraguay an rawn erlet ve a, hun tawpna’n minute ruk chauh a awm tawh tihah sihnih thunin an siphurh an zut zo ta mai a,
2-2 a nih hnuin penalty shootout hmanga thelh an ni a, tah hian 3-1-in India an vannei ta zawk a ni.
Get real time updates directly on you device, subscribe now.