India leh China aiawhten LAC chungchang sawiho

India leh China aiawhten LAC chungchang sawiho
India leh China chuan Thawhlehni khan Beijing-ah high-level meeting neiin ramri chungchang chipchiar takin an sawi dun.
Tun hi Working Mechanism for Consultation & Coordination (WMCC) on India-China Border Affairs thutkhawm vawi 33-na a ni.
Ram pahnih aiawhte hian Line of Actual Control (LAC) dinhmun an sawi a. Ramria thawhhona tha zawk neiha inpawh tawn zawk tha an ti a, lui leh Kailash-Mansarovar Yatra atan pawh inremna an siam.
Indian aiawh hi foreign ministry-a Gourangalal Das, Joint Secretary (East Asia)-in a ho va. Chinese aiawhte hi an foreign affairs ministry-a Boundary & Oceanic Affairs Department Director General Hong Liang-a’n a ho ve thung.
Beijing leh New Delhi hi kumina ramri chungchang sawi tura Special Representative (SR) inkawmna turah an inbuatsaih duh mek.
An thutkhawm zawhah hian Ministry of External Affairs (MEA) chuan ‘tha tak leh insiam thatna turin hlawk taka inbiak’ a nih thu a puang a. Lehlam lehlam hian ‘chipchiar leh uluk takin LAC dinhmun an thlir’ a ti bawk.
“Ram pahnih aiawhte thukhawm hian December, 2024-a Beijing-a ramri chungchanga zawhna awmte sawihova SR thut vawi 23-naa thil sawi leh rawtte a taka kalpui turna leh hma chhawpte an sawi a, ramri enkawl zel dan tur pawh an sawi,” a ti.
Beijing leh New Delhi hian LAC-a harsatna awm thinte chu palai leh sipai nen ‘tha taka hmachhawna intihchak tawn ni se’ an ti bawk.
An thutkhawm zawhah hian Indian aiawhte hruaitu, Das-a chuan Chinese Assistant Foreign Minister Hong Lei-a a kawm zui bawk.
Nikum October-a Russia-a Kazan khawpuia BRICS Summit-a Prime Minister Narendra Modi leh Chinese President Xi Jinping te an inkawm hnuah khan ram pahnihte hi kum 2020-a LAC-a an intihbuai vakna thlen hma anga awm leh kha tha tiin an inkungkaihna pawh an siam tha hret hret zel.
March 16 pawh khan Prime Minister Modi-a hi podcast host Lex Fridman-a’n a kawmnaah India leh China inkungkaihna hi a sawi a. Beijing leh New Delhi inkawmngeih chu an pahnih tan leh mi dangte tan pawh a tha tih a sawi a. Inrintawnna, inpawhna leh inthian thatna pawimawhna a sawi bawk.
Darkar thum chhung an kawmnaah hian Prime Minister Modi-a hian India leh China chu hman lai nunphung leh than zelna atanga inkungkaih tawh a nih thu a sawi a. Kum sang chuang chanchin hlui an neih tawhah an indo ngai lo tih a sawi a. Ram pahnih inkara inelna thianghlim awm chu tha a ti a, inelna chu buainaah a chang tur a ni lo tih a sawi bawk.
China pawhin Modi-a thu sawi hi ‘tha’ a tih thu sawiin inkungkaihna tha neih chu inthenawm ram tan duhthlanna dik a nih thu a sawi a. “Kum 2,000 chuang liam tawh atangin ram pahnihte hi inthian tha tak leh inzir tawn kan ni a, hmasawnna leh mihring thanna kawngah an thawh hlawk dun em em a ni,” tiin Chinese foreign ministry thupuangtu chuan a sawi.