India leilunga World Cup khelh tum lo Bangladesh

Thla thar mai hi India leh Sri Lanka-te inthlentawm tur T20 World Cup khelh tan hun a nih tawh laiin tunlai politik thila India nena boruak chhe tak nei mek Bangladesh rama an national cricket team chuan tournament khel tura India luh an tum loh thu an nemnghet tawh!
Draw-ah chuan Bangladesh hi Group C-ah England, West Indies, Nepal leh Italy-te nena awmho tur an nih laiin February ni 7 atanga khelh tan tur T20 World Cup chu India leilunga khelh an tan a rem lo tih Bangladesh Cricket Board (BCB) chuan puangin, he tournament-a an fixture-te chu hmun danga sawnchhuahsak turin ngenna an tichhuak zui nghal.
BCB emergency meeting chuan an dinna leh duhnate hi International Cricket Council (ICC) hnena thlen an rel dan zulzuiin thuchhuah pawh an siam zui ta a ni.
Politik thila ram pahnih boruak chhiat chhoh zel avangin Indian board lam rawtna angin Bangladesh bowler Mustafizur Rahman chu a khelhna Indian Premier League team pawhin an chhuah fel tawh a, chu chuan Bangladesh Cricket Board emergency meeting a hringchhuak at a, ICC hnenah an duhdan an thlen zui ta a ni.
Bangladesh hi India leilunga group-stage match li khel phawt tur an nih angin tournament tan ni taka West Indies su tur an ni a, February ni 14-ah England nen Kolkata khuaa intawng leh tur an ni bawk.
India nena inthethu mek thenawm ram dang Pakistan pawh India-ah an thlawklut dawn lo a, an match zawng zawng hi tournament thlengtu dang Sri Lanka lamah vek an khel dawn a, chuti ang chu Bangladeshi-ho pawh hian an ngiat zui ve ta a ni.
Mosolman sakhaw betu tam berna ram Bangladesh-a tharum nena nawrhna tunhnaia an huaihawt leh tumin Hindu mipa pakhat chu rapthlak takin mipuiin khawlaiah an chaihhlum a, chuti ang chu tunhnai lehzualah a thleng nawn leh tih thawm a awm bawk a; thenawmte hian India hmarchhak hi India chhuhsak an duh thu an sawichhuah tawh bawk avangin ram pahnih inkar boruak a chhe takzet a, cricket meuh pawhin a tuar zui ta a ni!
Muslim-majority Bangladesh rama mipuiin Hindu pa an sawisak hlum chhan kha an pathian a sawichhiat vang niin an puh a, an chet dan khan India rama Hindu nationalist group hrang hrangte a tithinur takzet a, lungawilohna an lantir ve nghal nghe nghe a ni.
Heti taka India dodalna boruak a rawn len tak phut chhan hi kum 2024-a Bangladeshi thalai rual lungawilo pungkhawmin sawrkar an namthluk hnua an prime minister hlui Sheikh Hasina tlanchhuak India-in a lo hum vang kha niin, Bangladesh sawrkar thar lo ding ta chuan Hasina hi an rama thawnkir turin vawi duai lo ngen bawk mah se India sawrkar chuan a thawnlet duh lo a; tunhnaia Bangladesh rama an zirlai hruaitu langsar Sharif Osman Hadi thah a nih duh loh lantirna hunah mipui thinrimin Hindu pa an chilhlum zui ta a ni.
Inrini khan Kolkata Knight Riders chuan Bangladeshi cricketer Mustafizur nena IPL contract an lo ziah tawh chu an hnukkir a; chuti ang tura club an hriattir chhan chu Board of Control for Cricket in India (BCCI) lamin tarlang chiah lo mah se an pawl secretary Devajit Saikia chuan tunhnaia ram pahnih inkar boruak chhiat chhoh zel vang niin a sawi thung.
Pathianni khan Bangladesh Cricket Board chuan an aiawha T20 World Cup khel tur 15-strong squad an puan rualin ICC hnenah India-a match khelh an duh loh thu leh hmun danga inkhelh dilna an thehlut a, he thu buatsaih lai thleng hian ICC chuan BBC ngenna hi an la chhanglet lo.