India leilungah Milan derby ?!

India leilungah Milan derby ?!
Europe league liana khel club hraw zual hoin hak zauhna leh an sum dinhmun chawikanna atan oil vanga hausa tawntaw Arab rama cup match ilo khelh an intihhmuh chhoh mek laiin Italian Serie A pawhin a maka maka tam mihring inekbengna India rama huang (fan base) zauh an tintuah mek a, an club ropui pahnih AC Milan leh Inter Milan-te’n Italian Super Cup match an khelhna turin he ram hi an thlithlai mek!
Italian league commercial and marketing director Michele Ciccarese chuan tunhnai khan he thu hi sawichhuakin, India chu Italian Super Cup thlengtu tur a nih theih thu leh ‘2036 Olympics for Indian football’ tih thupui hnuaia Indian football chawikanna lam an hawi thu a tarlang tel.
Italian Super Cup hi season liamta zela Serie A leh Coppa Italia lama champion team leh runners-up ve ve te khelh mi niin, kumin Jauary thla khan Saudi Arabia ramah nghah a ni a, 3-2-a Inter Milan hnehtu AC Milan kutah a vawiriatna atan he trophy hi a lut nghe nghe.
RCB Innovation Lab Indian Sports Summit chhima India a lo luh laiin Italian football-a mi pawimawh Ciccarese hi chanchinbumite’n India leilunga Super Cup nghah a nih dawn leh dawn loh chungchang an zawt a, Ciccarese chuan India rama Italian Super Cup khelh chu an league hmalakna (strategy) nena inmil thlap a nih thu a sawi tlat!
“Khawvel hmun tina Super Cup-te ang international trophy kualtir hi kan tihphung a ni a, a chhan mawlmang berah chuan thlirtu tam zawk kan duh vang a ni mai a, kalphung tha ber phawkchhuah kan duh vang ani tel bawk.
“Ti chuan, inbiakna pawh a kal zel ang a, he hmunah ngei hian lo kalin India rama inkhelh puitlin turin kan indawr zel dawn a ni,” a ti.
India hian 2036 Olympics thlen tumin theihtawp a chhuah kal mek a, a hlawhtlin mai pawh a rinawm a, hei vang hian sawrkar laipui leh national federation hrang hrang pawh an insingsa chho tan mup mup a tih theih a, India leilunga Olympic nghah a nih huna bil lutuk bik nih loh tumin sport hrang hrang an inbuatsaih tan a, football lam pawhin ‘2036 Olympics for Indian football’ tih project hnuaiah Italian Super Cup a dawl hnai niin a lang!
Ciccarese chuan a sawi zelnaah khawvela cricket league hmui ber leh khawvel hmun tina cricketer tha ber berte fuankhawmna ni kumtin Indian Premier League (IPL) cricket competition chuan mi rilruah India leilunga infiamna dang pawh a hlawhtlin zel theih beiseina a tipung a, chutih rualin ‘Made in Italy’ project leh hmalam hun nei eng tak India insuihzawm chu an hreh lo niin a sawi.