INDIA meeting-ah Kejriwal-a’n tel tur thu sawi

INDIA alliance member Aam Aadmi Party leh Congress te chu Delhi-a Lok Sabha seat chungchang sawiah boruak sang an nei chungin Delhi Chief Minister Arvind Kejriwal chuan Mumbai a Opposition alliance inhmuhkhawm tum thumnaah a tel dawn tho thu a sawi.
Kar kalta Nilaini khan Congress leader Alka Lamba chuan Delhi-a seat pasarih te chu chuh turin an inpuahchah a tih avangin hei hian AAP te chu a tilawm lo hle a ni.
“Alliance kan nei dawn nge dawn lo thutlukna kan la siam lo va, seat pasarih chang turin kan inpuahchah mek a ni” tiin Lamba chuan a sawi.
AAP te chuan hei hi chhang letin Congress tena Delhi a anmahni chauha din an tum a nih chuan Mumbai a INDIA alliance meeting a tel tura kal a tulna a awm lo an ti zui nghal thung a ni.
Mahse a hnuah Kejriwal chuan, “Mumbai-ah kan kal ang a, kan strategy kan hrilh ang che u,” tiin a sawi zui a ni.
AAP te chetdan chu sawiselin Congress leader Sandeep Dikshit chuan Alka Lamba thusawi chuan Aam Aadmi Party nena alliance chungchanga thutlukna siam nena inkaihhnawihna engmah a nei lo a ti a.
INDIA alliance-ah engmah buaina a awm lo ti bawkin, “Lok Sabha seat 543 lai a awm a, AAP tih chauh lo chuan hetianga alliance chungchang sawi an awm lo. UP-ah Samajwadi Party te an lian em em chungin alliance-ah buaina a awm chuang lo. AAP te hian alliance chhuahsan an tum leh tum loh sawi chiang mai rawh se” tiin Congress hotu Sandeep Dikshit chuan a chhang let thung a ni.