India mi 3,000 chuang US-Canada ramri-ah tang

India leh Canada ram inlaichinna chu September thla atang khan a tha theilo a, Canada chuan Khalistan hotu Hardeep Singh Nijjar thih thu-ah India chu Canada ram chhung ngeia inrawlhah a puh a ni. Ram pahnihte inkara harsatna awm mek hian India mite chu Canada kaltlanga United States luh an tumna a titawp chuanglo a ni. US Customs and Border Protection (USCBP)-in data an neih atanga a lan danin kumin September thla chhung ringawtah India mi 8,076 te chu kawng hrang hrang atangin US luh tumin an man a ni.
Heng zinga 3,059 Or 38% te chu US-Canada ramri vela an mante an ni a. Hei hi October 2022 leh September 2023 inkara thla tina an man hnem ber tum a ni. Thu dawnna hnarin Times of India a hrilh danin India mi, a tam ber chu Gujarat mi te niin Canada-ah an inbengbel te te a, heta tang hian thenawm ram US-a luh dan kawng an dap ta thin a ni.
Thu dawnnain a sawi danin, “Kum 2023 August thlaah khan danloa US-a lut ru leh danloa sumdawnna tawlh ru mi 2,327 man an ni a. Hei hi September-ah pung chhoin mi 3,059 ah an pung chho a ni” tiin a sawi. Heng danloa India mi pemte hi mimal an chhungkua zawng zawng nena pem 530 te, naupang tello pali leh chhungkua naupang pali telna te an ni a.
A hlawm lian ber chu puitling mahni-a tla hrang 2,521 te an ni. Kumin September thla vekah hian US-Mexico ramri velah danloa awm an man chu mi 3,862 an ni a, Canada ramri vela thil thlen nen a inang hle a ni. Heng bakah hian February 2019 leh March 2023 inkarah India mi danlo-a US a luh tum mi nuaih 1.9 te chu man an ni a.
Chhungkaw tam takte chuan an hmangaih tak takte chu chan phah mahse la danloa US-a luh ruk tumna chu a la reh tak tak thei chuanglo a ni. Mehsana atanga chhungkaw pakhat danloa US-a luh ruk tumte chu St Lawrence River-ah kumin April thla khan an lo tla hlum tawh a ni. Chhungkaw dang Gandhinagar-a Dingucha thingtlang khuaa mite chu US-Canada ramri atanga metres 10 vel leka hlaah January 2022 khan khaw vawtin a lo hmet hlum tawh bawk.
Police officer pakhat chuan India atanga danloa US-a luh tumte hi Gujarat police te leh India rama agencies hrang hrang te, US leh Canada atangtein tihtawp tum thin mahse tih tawp tak tak theih a nilo a ni.