INDIA MP ten President hnenah ngenna siam

Leader of opposition bloc INDIA te chuan August 2 khan President Droupadi Murmu hmuin Parliament-ah Manipur chungchanga Prime Minister Narendra Modi statement siam ngei an phutna leh remna leh muanna a awm vat theih nana hma la tura an ngiatna an thehlut.
Hei bakah hian Prime Minister chu buainain a chim mek Manipur state chu tlawh ngei tur leh inbakkaih mek community te hnena ngenna siama inunauna tha tuh tura hma la turin an ngen bawk.
President hnena memorandum an thehluhah hian opposition bloc party leader 31 te chuan Haryana a Nuh-a communal tension awm mek chungchang chu sawi lang bawkin Central sorkar chuan ‘Prime Minister’s Office atanga 100 km’ a hla chauha thleng chuan a tibuai lo hle tiin an puh bawk.
President an hmuh hnua media kawmna an neihah Congress president Mallikarjun Kharge chuan MP thenkhat tun hnaia Manipur tlawh tute chuan President hnenah Manipur state an tlawha an thil hmuh leh hriat te an hrilh tiin a sawi bawk.
Kharge chuan Rashtrapati Bhawan pawna reporter te hnenah alliance member 31 te chuan President an hmuhnaah Manipur a thil thleng chu an hrilh thu a sawi bawk.
“President hnenah memorandum thehlutin Manipur a tharumthawhna la thlen zel dan kan hrilh a, a bik takin hmeichhiate laka hleilenna leh saruaka awmtir an nih dan te kan hrilh a ni,” tiin a sawi bawk a. Manipur-ah chenna In 5,000 chuang hal ni tawhin mi 200 chuangin nunna an chan tawh a, mi 500 chuangin hliam an tuar phah tawh a, chenna in leh lo tlansan 60,000 chuang an awm tawh an ti bawk.
Rehabilitation camp siam te heng harsatna tawkte dahna chu chenna tura ruahman ni lo leh medical facilities pawh awm lo a ni an ti bawk a.
“President chu Manipur issue ngaihven turin kan ngen a. President hnenah hian Manipur leh Haryana a tharumthawhna thleng mek engkim kan hrilh a ni,” tiin Kharge chuan a sawi bawk a.
“Kan ngen ngawl ber chu prime minister-in Manipur chungchang sawiin a tlawh ngei tur a ni bawk a, Manipur a remna leh muanna a awm theih nan leh mipuite chhawk nan hma a la tur a ni,” tiin a sawi bawk.
“Prime Minister chu rang taka Manipur chungchanga sawi nei tura nawr turin kan ngen che a, chumi hnuah ngunthluk taka sawihona awm ngei se kan ngen bawk a ni,” tiin Opposition bloc te chuan memorandum an thehluhah an tarlang a.
“Tawi khawmuang hauh lova Manipur state-a remna leh muanna a awm theih nana hma laa inrawlh turin kan ngen che a. Tun hnai ni 92 chhunga thil thlen dan kimchang hriatfiah ngei ni se kan duh bawk a. Union government leh state sorkar te chuan an tihtur tia community tuartute hnenah justice an thlen ngei kan phut bawk,” tiin memorandum chuan a tarlang bawk.
Memorandum an thehluhah chuan President Droupadi Murmu inrawlhna chu Manipur mipui nasa taka tawrhna nei mek te thlawpa chhawk zangkhai nan a tul an ti bawk.
President Droupadi Murmu tlawha Kharge tawiawmtu congress chief kal te zingah Tiruchi Siva, Kanimozhi, Rajiv Ranjan ‘Lallan’ Singh, Adhir Ranjan Chowdhury, Gaurav Gogoi, Sushil Kumar Gupta, Sushmita Dev, Jayant Singh, Manoj Jha te chu langsar zual an ni a. Kharge chuan Manipur chungchang chu opposition ten Parliament house pahnihah ngaihtuah an phut thu leh sorkar in remtihna a pek duh loh thu an thlen bawk.
“Ka mic chu Rajya Sabhaa thusawina hun min pek hnu second rei lo teah tihtawpin a awm a, treasury benches te chuan bengchheng an siam zui nghal a ni. Hei hi opposition te hmuhsitna niin Chairman in House leader leh Opposition te intluktlangin a en a ti chung pawha thleng a ni,” tiin Kharge chuan a sawi bawk.
Trinamool Congress leader Sushmita Dev chuan president chu community hrang atangin Manipur hmeichhia pahnih Rajya Sabha-ah Manipur-a hmeichhiate laka pawikhawihna thleng siam that a nih theih nana nominate turin a ngen bawk a ni.