India nen Rafale kan siam dawn – French President Macron

India nen Rafale kan siam dawn
– French President Macron
French President Emmanuel Macron-a chuan France leh India ramten venhimna khawngah thawhhona thar chuang chhuakin Rafale indo thlawhna leh helicopter an siam dun dawn tih Ningani khan a puang a. France chuan India hnenah hian tuihnuailawng tam zawk hralh a inbeisei tih a sawi bawk.
Ni thum tlawha India a zin meknaah Macron-a hian thuthar lakhawmtute hnenah India-in Rafale 114 a chah leh chu ram pahnihte inkara venhimnaa ‘rahbi thar zawh zelna’ tia sawiin France chuan tuihnuailawng pawh a hralh a inbeisei tih a sawi.
“Rafale chungchangah hian kan duh chu huang zauh zel a ni a. India hian ni rei vak lo liam taah khan Rafales 114 lei tumna a nei tawh a, India-ah kan siam dun dawn a ni,” a ti.
Indian defence ministry hnuaia Defence Acquisition Council (DAC) chuan air force tana missile leh thlawhna dang ruala Rafale 114 lei rawtna chu kar hmasa khan a lo pawm tawh a. A hma lawka India leh Pakistan inkar buaina chhuak atang khan French indo thlawhna neih belh hi tulin a hre zual a ni.
India hian Rafale 36 a lo lei tawh a, tuipui sipaite hman chi 26 dang a chah mek bawk.
Rafale lei tura indawrnaah hian insiam tawm pawh a tel a, technical leh sumdawnna thila indawrna a fel hnuah puan a ni dawn a. Indian chanchinbute chuan Dassault Aviation-in an siam thlawhna 114 hi $ tluklehdingawn 35.65 man tur niin an tar lang.
114 zinga 90 hi India-ah ram pahnihte thawhhona hnuaia siam tur niin indawrna thil hria, a hming sawi lan duh loh chuan a sawi.
“Rafale hi kan inkara pawimawh a ni a. Tuihnuailawng pawh kan indawr theih ka beisei a, kan la sawi zel ang,” tiin Macron-a chuan a sawi.
Indian navy hian French Scorpene tuihnuailawng paruk a hmang mek a, tual chhung chanchinbute chuan a dang lei an duh niin an tar lang.
Thawhlehni khan Macron-a leh Indian Prime Minister Narendra Modi hian H125 helicopter remkhawmna tur pawh an lo puang tawh a, hei hi India-a Airbus leh Tata Advanced Systems ten an insiam tawm tur a ni a. India-ah hian HAMMER missile pawh Safran leh Indian sorkar hnuaia mi, Bharat Electronics ten an siam dun dawn bawk.
Rafale indo thlawhna hi Indian Air Force chuan May thlaa Pakistan nen an indo tum khan hmangin an fak hle.
Reuters chuan Pakistan-in Chinese siam J-10C indo thlawhna a hmanin Rafale pakhat a kap thla niin US sawi a tar lang a. New Delhi pawhin an thlawhna an chân thu a sawi a, Rafale a ni tih erawh a sawi lo.