India nen sumdawna thilah kan inrem tep – Trump

On Jul 18, 2025 11 0

India nen sumdawna thilah kan inrem tep – Trump
Washington leh Delhi chuan sumdawnnaa inremna tur an ‘puitlin hnai hle’ tih US President Donald Trump-a’n a sawi a, ram pahnih aiawhte hi an inbiak chhunzawm zel bawk.
“India nen kan inbe rem thei tep a, inzawrhna a inhawng lehzual dawn,” tiin Trump-a hian Nilaini khan White House-ah thuthar lakhawmtute a hrilh.
Hemi ni vek tlai lamah hian Real America’s Voice-in an kawmnaah India nena inremna hi ‘a hnai tak zet’ tih a sawi leh bawk.
India leh US hi thla tam vak lo liam ta atang khan an inmil lo ve deuh ve, tariff tihsan vak lohna tura inremna siam an tum.
April 2 khan Trump-a hian Indian bungraw lak luhah chhiah 27% lak tur thu a puang a. Tariff thar hi July 9 thleng tihkhawtlai a ni a, US-in August 1 thleng a sawn hla thar leh bawk.
Indian palaite chu tun kar hian inremna siampui tumin US an chamchilh mek niin Reuters chuan a tar lang a, inremna pawh an tifel tep niin Indian sorkar hian a sawi.
Thla hmasa khan Indian thuneitu sang rualte hi inbe chhunzawm tura Washington-a cham zui turin tih an ni a, eng ang inremna nge neihpui an tum tih chu zawhna a ni.
Ram pahnih hian inremna chu tu ve ve tan pawha tha a nih tur thu an sawi ve ve a. Thawhlehni khan Trump-a chuan la neih ngai loh inremna tur a nih thu leh US chuan inzawrhna atan India ‘luh theihna’ a nei dawn niin a sawi.
Indian Commerce Minister Piyush Goyal-a chuan tun kar khan inbiakna chu chak takin a kal tih a sawi a. Hetih lai hian chawlh tam vak lo liam ta chhung khan India hian sumdawnnaa inremna hi tiam chin neia tih a tum loh thu leh ram thatna tura tih a ni dawn tih a sawi.
Ram pahnihte hian thla eng emaw zat an indawr tawhah mutan an la nei a, hei hi lo neihna thil lam te, lirthei bungrua leh Indian steel-a tariff lak chungchang te a ni.
Tun hnaiah US hi India-in a sumdawnpui ram lian ber erawh a ni tho va, an inkara sum che hi $ tluklehdingawn 190 a tling hial a. Trump-a leh Prime Minister Narendra Modi-a chuan hei hi a let aia tama tipunga $ tluklehdingawn 500 tlintir an tum.