India-Russia inremna tur tam tak hmawrbawk hnai

India-Russia inremna tur tam tak hmawrbawk hnai
India leh Russia chuan inremna tam tak siam turin a hmawr an bawk thei hnai mek a, Russian President Vladimir Putin-a’n thla leha New Delhi a tlawh hunah a dangte pawh tihfel a ni bawk ang.
Putin-a India-a a zin tur inbuatsaih nan hian Thawhtanni khan Indian External Affairs Minister S Jaishankar-a chuan Moscow-ah Russian Foreign Minister Sergey Lavrov-a a kawm.
An inkawmnaah Jaishankar-a hian, “Tun hi ka tan chuan a hlu a, President Putin-a’n kum tin inhmuhkhawm vawi 23-naa India a tlawh tur inbuatsaihna a nih avangin a pawimawh zual,” a ti.
“Ram pahnih inremna tur, hmalakna leh hna thawh tur tam tak sawi a ni a. Ni rei lo te hnuah peih fel a ni tawh dawn a ni,” a ti a. “Hengte hian kan inkara inpawhna hlu leh bik tak a siam dawn a ni,” a ti.
Jaishankar-a hian India chuan Russia-Ukraine buaina titawp tura hmalakna a thlawp thu a sawi bawk a. “India chuan muanna a awm theihna turin lehlamin thil an siam that zel a beisei,” a ti.
India-Russia inkungkaihna chu khawvel pum nghehna atana pawimawh tling a nih thu Jaishankar-a hian a sawi a. “Kan inkungkaihna lian leh thang zel hi kan pahnih tan chauh ni lovin, khawvel pawhin a hlawkpui a ni,” a ti.
Lavrov-a leh Jaishankar-a te inbiaknaah hian ram pahnih thil bakah khawvel huapa thil thleng mek hrang hrang pawh an sawi dun bawk.
Russian president hian India hi December 5 velah kum tin inbiakna awm thina Prime Minister Narendra Modi nena inbe turin a tlawh dawn a. He inbiakna hi ram pahnih tan thil hlawk tak a nih ngei beisei a ni.
India-Russia annual summit hi vawi 22 neih tawh niin India leh Russia-ah a chhawka nghah thin a ni a. Nikum July khan Modi-a hi Moscow-ah inbe turin a kal ve thung a ni.