India sawrkar duhdanin kan kal

India sawrkar duhdanin kan kal
– AMPEDA
Oil hralhchhuah chungchangah dan dik lo taka hralh anga ngaih theiha sawi an nih chungchangah petrol pump neitute chuan India sawrkar duh dan leh inkaihhruaina angin an kal mai zawk a, dan bawhchhiat an nei lo tih an sawi.
All Mizoram Petroleum Dealers Association (AMPEDA) thuchhuak chuan, tunhnaiah kawng tha tawk lo leh thildang avanga Mizorama oil lut a khaihlak deuh leh mipui duhthala oil hmuh theih loh thinah mipuiin awlsam taka oil an mamawh an lak theihna turin theihtawp an chhuah ve reng a, India sawrkar thuchhuah anga ‘marketing discipline guidelines’ fel tak neiin an kalpui tih a sawi.
Mizoram a ni emaw Manipur a ni emaw khawi state mahin quota an nei hran loa, contractor leh an hnen atanga a tam thama oil la; petrol pump awm ve lohna khua tiamin chhun lawn, mipui nawlpui mamawh lak hunlaia inrawlh buai loa, zan lam, mipui thawl tawh hnu changin mipui tibuai lo zawnga oil pek thin an ni tih sawiin, a hlawma bura pek thin, rate dik taka an pek chu ‘black a ni lo tih a sawi.
‘Petrol pump hi private business a ni a, oil company lam atangin a tam thei ang ber hralh tura beisei kan ni a, target-te tuk kan ni. Kan hralh tam hian sawrkarah tax kan chhung hnem thei a, mipui mamawh inrelbawlnaah nasa takin tha kan thawh ve thin a ni,’ a ti.
Oil a ni emaw thildang a ni emaw harsatna a awmin, sawiho a, dawhkan kila sutkian dan kawng zawn chu tute pawhin an tih turah an ngai tih AMPEDA hian sawiin, pawl thenkhatin an nawm an maka tih leh tih loh tur tuk chu an kal dan turah an ngai loa, sawrkar laipui inkaihhruaina hnuaiah fel taka kalpui an ni tih a sawi a ni.