India sawrkar hnuaiah thawh tur a tam – Chief minister

Mizoram state sawrkar hnuaiah hnaruak tlem tawh mah se, India sawrkar hnuaiah erawh luh theihna a la tam reng a, henga exam-a tling tawh ten kan zirna system leh syllabus an dem ngai lo tih chief minister Lalduhoma chuan a sawi.
Ningania Serchhip Teachers’ Association (STA) General Assembly leh an Golden Jubilee lawm a hmanpuinaah chief minister chuan, UT sawrkar kan neih laiin sawrkar hna a pung a, lehkhathiam kan la tam lutuk loh bawk avangin sawrkarah an lut zung zung a. Hun a lokal chho a, sawrkar hnaruak pung zel aiin lehkhathiam pung zel kan tam zawk thuai a, sawrkar hnaa luh a har ta tial tial tih a sawi.
Mizoram sawrkarah hnaruak tlem mah se, India sawrkarah erawh luh theihna a la tam reng a. Kan thiamnain a tlin phawt chuan SSC, Railway Recruitment Board, IBPS lamah hna a la tam hle tih a sawi a ni.
“Rel kawng a rawn tlang a, an service tep tawh. Kan rail station enkawltu tur Mizo thalai, Railway officer leh staff tam tak kan mamawh dawn. Mizoram Rural Bank manager tur Mizo thalai kan mamawh tam hle. Mahse IBPS exam paltlang thei kan nei mang tlat lo. Heng kan harsatna tawh mek hi zirtirtuten chonaa ngaiin thalai tha, taima leh tumruh zawk min chherchhuah sak tum ang che u,” a ti.
Heng central subordinate staff leh banking exam hrang hranga Mizo thalaite an tling hleithei lo chu zirtirtuten chonaa ngaiin, tling zo ngei tura buatsaihna lamah tan la turin a sawm tih a sawi a ni.