India squad la thlitfim turah Valpuia a tel
Indian senior men’s football team head coach Manolo Marquez chuan Fifa international friendly match-a Malaysia hmachhawn tur squad la thlitfim leh tur player 26 a koh zingah tun season-a Indian Super League champion Mumbai City FC tlarhnung tana khel tha leh hmun lailum chang chho ta Hmingthanmawia Ralte (Valpuia) a tel.
26-member probables list-ah hian Durtlang star Valpuia bakah Mizo player dang pathum – midfielder Lalengmawia Ralte leh forward pahnih Edmund Lalrindika leh Lallianzuala Chhangte an tel bawk.
Tun season-ah Valpuia hian a khel tha satliah a ni mai lo a, a khel hi a hmuhnawm tel a; tlarhnung ven mai piahlamah Mumbai attacking-ah a tangkai tel a; India final squad-ah hian a tel zui zel dawn em tih erawh hriat theih a la ni rih lo.
Kum 2021-2023 chhunga Mumbai City enkawltu English coach Des Buckingham-a hnuaiah khan khelhna hmun a chang hlei thei lo a, Oxford United lama a chhuah hnuah Mumbai boss thar Petr Kratky duhsakna a hlawh zui ta a; tunhnai chhoah phei chuan Czech professional football coach Kratky hian starting line up a chantir chho deuh ngar ngar a, India tana khel thei dinhmunah a ding zui ta hial a ni.
Probable squad-ah hian Intercontinental Cup khel player thenkhat bakah September leh October thlaa Vietnam hmachhawn player an lang lo nual a, India camp-a kirleh langsar zingah defender Sandesh Jhingan a tel.
He experienced centre-back hian AFC Asian Cup campaign laia a khup a tihnat hnu khan khelmual a lut leh ta lo vang vang a, Manolo club team FC Goa lamin an senglut ta bawk nen a fitness-in ngai a rawn awh chhoh leh mek avangin national coach tan pawh tlarhnung laihawl luah turin duhthlan tur a awm belh dawn niin a lang.
Manolo hian Chennaiyin FC forward la naupang tak Irfan Yadwad bakah a koh than attacker rualkhat – Manvir Singh, Lallianzuala Chhangte, Edmund Lalrindika, Liston Colaco, Farukh Choudhary leh Vikram Pratap Singh-te a ko leh bawk.
Squad hmasaah hian NorthEast United FC midfielder khel tha tluang tak Jithin M.S pawh a tel.
India hian Hyderabad khawpuia GMC Balayogi Gachibowli Stadium-ah Malaysia hi a mikhual dawn a; November ni 11 atang hian thlanchhuah hmasak team-in inbuatsaihna camp an lut tan ang a, tah chuan final squad-a tel tur thlitfim an ni ang.
-- Advertisement --
India probable squad
Goalkeepers: Amrinder Singh, Gurpreet Singh Sandhu, Vishal Kaith.
Defenders: Aakash Sangwan, Anwar Ali, Asish Rai, Chinglensana Singh Konsham, Hmingthanmawia Ralte, Mehtab Singh, Rahul Bheke, Roshan Singh Naorem, Sandesh Jhingan.
Midfielders: Anirudh Thapa, Brandon Fernandes, Jeakson Singh Thounaojam, Jithin MS, Lalengmawia Ralte, Liston Colaco, Suresh Singh Wangjam, Vibin Mohanan.
Forwards: Edmund Lalrindika, Irfan Yadwad, Farukh Choudhary, Lallianzuala Chhangte, Manvir Singh, Vikram Partap Singh.