India tan world cup beiseina tlahniam

FIFA World Cup second round qualifiers match-ah Thawhlehni zan khan nikum tournament thlengtu Qatar an mikhual a, Bhubaneswar khawpuiah sithum faia tlawmin India world cup khelh beiseina a tawp fel.
Mizo pathum telna Blue Tigers tan Asian champion Qatar chu an la khawng deuh a, Kalinga Stadium-ah chungnung taka inkhel thununin, an hun tha neih zawng zawng goal-ah chantir thei phei se la mualneitu team kha 0-3 lek lo deuha tlawm thei tur an ni!
Arab team-in minute 90 chhungin inkhel an awpbet hneh hle a; minute lina lekah Moustafa Tarek Mashal chuan goal hmahruai khungin, second half tan hnu lawkah Almeoz Ali goal hmuh tur a awm leh a, an goal thumna erawh fan hretin, minute 86-ah Yusuf Adurisag chuan mikhual goal thumna a thawh ve leh.
Kumli kalta khan India hian rinloh takin Qatar hi goal awm loin an lo draw ve khiah tawh a, Thawhlehni zan home match-ah beiseina engemaw tak nei chungin khelmual lut bawk mah se goal chance siamchhuah an harsat a, first half-a an hun tha neih tlemte an hlawhtlinpui zo lo.
Igor Stimac-a team hian November ni 16-a sikhat faia mualneitu Kuwait an hneh avang khan Group A-a pahnihna dinhmun luaha a tumkhatna atana third round lut turin beiseina an la nei.
Qatar lakah hian Mizo star pahnih Lallianzuala Chhangte leh Lalengmawia Ralte chuan luh hmasak changin, Lalchungnunga pawh bench atangin a lut a, an khel chhe lo vek chungin nikum world cup-a world champion ni zui ta Argentina meuh hneh thei team lakah India tlawm tur an chhan zo ta bik lo a ni.
India hian nakkum March ni 21 khian 2026 World Cup qualifiers match hi an khelh chhunzawm leh chauh dawn a, hei hi neutral venue a ni dawn a, Dushanbe, Tajikistan-ah Afghanistan nen an intum ang.