India tana badminton khel tur |hazuala leh Ramsanga

India tana badminton khel tur |hazuala leh Ramsanga
July ni 23-27, 2025 chhunga Solo (Surakarta), Indonesia- anghah tur Badminton Asia Junior Championships 2025-a India aiawh a khel thei turin H. Lalthazuala s/o H. Zohmangaiha, Chanmari West leh C. Lalramsanga s/o C. Lungmuanpuia, Durtlang-te an invaw tling.
Badminton Association of India (BAI)-in June ni 8-11, 2025 chhunga New Delhi-a final selection trial a buatsaihah Mizoram player pathum – |hazuala, Ramsanga leh Lalrempuii (Serchhip)-te koh an ni a; |hazuala hi boy’s singles category-ah inlanin, Ramsanga leh Rempuiite hi mixed doubles category-ah an inlan thung.
|hazuala a ropui
Badminton Asia Junior Championships 2025-a India aiawh thei tur final selection trial hmachhawn tur hian boy’s singles category huangah India top player 11 koh an ni a; stage 1-ah he’ng player-te hi group A leh B-a then niin, |hazuala hi group A-ah player dang pangate nen a awm a, an inkhel kual.
He group-a a awmpuite hi India no 2 Gnana Dattu TT te, India no 5 Suryaksh Rawat te, India no 7 Sarvesh Mahesh Yadav bakah Badminton World Federation (BWF) ranking-a no 10 ni phak Sai Prasad Teegala leh no 13 Abishek Kanapala-te a hneh fai vek a ni!
Group A leh B-a a sang pahnih ve ve-te’n stage 2 an khel leh a, hetah hian player pali te hi an inkhel kual vek thung.
|hazuala hian India no 4 leh men’s singles-a India no 6 ni mek Rounak Chouhan chu straight set-in a hneh phawt a, chumi hnuah ranking no 3 Pranauv Ram N nen intum lehin, deciding game-ah a chak.
A match tawp berah group stage-a a lo hneh tawh Suryaksh Rawat nen intum nawn lehin, straight set bawkin a chak leh a, a tumpui zawng zawngte hneh vek chungin India aiawh turin a invaw tling a ni.
Ramsanga a sang zel!
Mixed doubles category huangah final selection trial hmachhawn turin India junior player tha leh ranking nei sang pair paruk koh an ni a, hetah hian Ramsanga hi Taarini Suri nen an inkawp.
An match hmasaberah top seed Vansh Dev leh Shravani Walekar-te tangdun an hneh phawt a, match hnihnaah Mithilesh PK leh Reshika U-te inkawp hneh lehin, a dawtah Bjorn Jaison leh Vishakha Toppo thawkdun bakah Showrya Kiran J leh Lalrempuiite tangdun an hneh leh a, chak loh nei loin final selection trial an paltlang a, India ai an awh dawn a ni.
Rempuii pawh hi girl’s doubles leh mixed doubles huanga inelna hmachhawn thei dinhmunah a ding a; girl’s doubles-ah chuan a partner hlun kianin, hemi category bikah hian a inlan ta lo.
Mixed doubles category-ah erawh an aia chak hnem zawk an awm avangin an tlang thei ta lo a ni.
Lawmthu sawina
Mizoram Badminton Association chuan India tana khel thei khawpa player tha an player-te hi a chhuang takzet tih thuchhuah siamin an tarlang a; Mizoram mai piah lamah India ram tihmingthatu ni zel turin duhsakna sang ber an hlan nghal bawk.
Mizoram badminton-in tun dinhmun a thlen theihna’na an thawhpuite – TATA Trusts, Pullela Gopichand Badminton Academy (PGBA), NEIDA, Mizoram State Sports Council (MSSC) leh Sports and Youth Services Department-te chungah lawmthu an sawi rualin, Mizorama badminton-in hma a sawn zel theihna’na Mizoram Badminton Centre, Zuangtui enkawl tirtu Aizawl Smart City Limited chungah pawh lawmthu an sawi nghal bawk.