Indian a thawn haw thawh linain Delhi thleng
US-a dan lova India atanga lut thawh let vawi linaa mite chu Pathianni khan Delhi-ah tumpui an ni tih thuneituten an puang.
Panama tlawhin hawpui an ni a. Mi 12 niin pali chu Punjab mi an ni a, Amritsar-ah an haw tlang nghal.
Dan lova US-a Indian lut thawh haw hmasak berte chu February 5 khan US sipai thlawhna hmangin Amritsar-ah tumpui an ni a, mi 104 an ni.
Heng mite hi US-in a tih danah sawisel a tam avangin External Affairs Minister S Jaishankar chuan US biain thawn haw dangte chu tih dan pangngai lova tih an awm tawh loh tur thu a sawi hial a. US-in an rama dan lova awm thawn haw chu thil thar ni lovin, tun hma pawha an tih reng a nih thu a sawi bawk.
US President Donald Trump-a sorkarin an rama thawn haw a tum mi 300 chuang chu Panama-a khualbukah dah an ni a, thuneituten an haw dan tur an ngaihtuahsak.
An zinga 40% vel chuan thawn haw hi an duh lo va, UN agency-ten an ram ni lova kaltir dan a dap mek a. US-in senso tum vek mah se Panama hian an ram chu mihring inhlan chhawnna hmuna hman a nih avanga a lawm loh thu a sawi ve mek bawk.
President Trump-a hian ram dang mi, an rama dan lova awm thawn haw hna a kalpui hi sawiseltu awm mah se a ti tlat a. ‘Mi bumtu, dawt sawi, thiangzau leh tul lo then fai’ tiin a sawi a ni.
An rama dik lo taka awm thawn haw chu a policy pawimawh niin a sawi bawk.
Kum 2022 khan dan lova pem lut hi US-a cheng zinga 3.3% an tling a, 23% zet ram dang mi hrin an ni bawk niin Pew Research Centre chuan a chhinchhiah.
Indian thawn haw hmasak berte khan President Jose Raul Mulino-a’n an rama luhpui a phalsak angin Panama atanga phurh haw an ni tawh.
Trump-a sorkar hian immigration agent-te chu ram dang mi thawn haw a chak lehzual theih nan pem lut fate, an nu leh pate tel lova an rama lutte pawh chhui chhuak vek turin an ti niin news agency Reuters chuan a tar lang.
Kum 2019 atang khan dan lova US-a awm fa nuai ruk chuang zetin US-Mexico ramri chu an nu leh pate tel lovin an kân niin sorkarin a chhinchhiah a ni.
Indian a thawn haw thawh linain Delhi thleng
Get real time updates directly on you device, subscribe now.
Prev Post