Internet tihthih tamah India-in hma hruai ta bik lo

On Feb 25, 2025 16 0

Internet tihthih tamah India-in hma hruai ta bik lo
Kum 2018 hnua a vawi khat nan India chu kum 2024 chhunga internet titawp tam ber a ni lo ve ta a, Myanmar hnuaiah a awm.
Hlawkna um lo digital rights advocacy group Access Now chuan Myanmar chuan nikum khan vawi 85 internet tihtawp a nei tih sawiin a sang ber an ni a, India chuan vawi 84 a titawp thung.
Khawvel pumah internet tihthih hi nikum khan a hma kum aiin a pung a. Kum 2023-ah khan ram 39-ah vawi 283 tihtawp a nih laiin nikum kha chuan ram 54-in vawi 296 an tithi thung.
“India hian vawi 84 tithiin hnaih takin a chunga mi a phak lo va, kum 2018 hnua a sang bera a awm lohna niin khawvela mipui rorelna rama hetiang zat tihthih a ni hi a pawmawm loh hle a ni,” tiin Access Now chuan report an siamah an tar lang.
India-a internet service tihthih a nih thin chhan ber hi buaina, lungawi lohna lantir, politics boruak chiri, chi leh chi inkara buaina, exam entawn thinna leh inthlan vang a ni tlangpui thin.
Nikum chhung khan lungawi lohna leh thil duh lohna lantir avangin vawi 41 tihthih a ni a, chi leh chi inkara buaina chhuak avangin vawi 23 tihthih a ni bawk.
State leh union territory 16-in internet tihthih hi tuarin Manipur (21), Jammu & Kashmir (12) leh Haryana (12) te chu a tuar tam ber an ni a. Manipur bikah hian nikum hmasa lam atang tawha chi leh chi inkara buaina chhuak chu a chhan lian ber a ni.
India dawtah hian Pakistan awmin vawi 21 tihthih a ni a. Russia (13), Ukraine (7), Palestine (6), leh Bangladesh (5) ten an dawt leh a. Pakistan-ah hian an ram pumah X, Signal leh Bluesky an titawp vek a, February 8-a an inthlan ni khan mobile an tithi vek bawk.
Report-ah hian ram pariatin ramri pela internet tihthih neiin hei hi ram 13-in an tuar niin an tar lang a. Access Now hian Russia-in vawi sarih a tihthih chu Ukraine-ah pawh an tuar niin a tar lang.
Heng thil hi Ukrainian internet service provider-ten cyberattack an tawh vang a ni pakhat a, missile paruk vekin Ukrainian energy pek chhuahna hmunpui a fuh avangin internet pek chhuah a buai phah bawk.