Indian film zinga sum sen tam berna

Indian film zinga sum sen tam berna
Indian film zinga sum sen tam ber ni a i rin zingah ‘Baahubali,’ ‘Kalki’ leh ‘Brahmastra’ te an tel ngei ang a, mahse, chuti lo lam daih chu a ni dawn tlat. Hman deuh khan India-a cheng vaibelchhe 50 senga film siam te kha sawi laih laih tham a nih hun lai a awm a, tunah erawh cheng vaibelchhe 100 tel senna film a kuh tel tul tawh. Nitesh Tiwari film siam, Ranbir Kapoor, Sai Pallavi leh Yash te channa ‘Ramayana’ chu an budget cheng vaibelchhe 835 a ni hem mai a, he mythological drama hi Indian film zinga manto ber a ni dawn ta a ni.
‘Ramayana’ hi filming an zo tawh a, tunah hian post-production lam an buaipui tawh a, Dewali 2026-a tlangzarh an tum. He film hi then hnih a tihchhuah a ni dawn a, a part 1 chu filming an zo tawh.
A hmaa India film zinga sum sen tam berna ni thin chu ‘Kalki 2898 AD’ kha niin, cheng vaibelchhe 600 senna a ni a, ‘RRR’ leh ‘Adipurush’ te pawh cheng vaibelchhe 550 senna niin, VFX an hman nasatna ‘Brahmastra Part One’ pawh kha cheng vaibelchhe 375 senna a ni.
‘Ramayana’ film director Nites Tiwari hi Aamir khan nena film hlawhtling tak ‘Dangal’ lo siam tawh kha a ni a, tun tumah hian ‘Ramayana’ thawnthu hi tlema a thlirna tlang dang deuh atanga thlirin a rawn chhawpchhuak dawn ta a ni.
He film-ah hian Ranbir Kapoor chu Lord Rama lemah changin, Sai Pallavi chu Sita lema changin, Kannada superstar Yash chu Ravana lemah a chang ve thung. Anni bakah hian Indian film khawvela hming lar tak tak Vivek Oberoi, Rakul Preet Singh, Lara Dutta, Kajal Aggarwal, Ravi Dubey, Kunal Kapoor leh midang te pawh an inlan.
He film-ah visual effect chu British-Indian VFX company, Oscar-ah pawh Best Visual Effects tum riat lo dawng tawhin an khawih dawn a, a Part 1 filming zo tawh mah se VFX pui tak a nih dawn avangin post-production pawh hi buaipui tham fê a la ni dawn a, Dewali 2026-ah cinema hall-a chhuah hman tura ruahman a ni.