Indian Football League 2025-26: Kashmir vur rama chak Chanmari

Indian Football League 2025-26:
Kashmir vur rama chak Chanmari
Indian top flight (ISL) hnuai chiaha second division inelna Indian Football League (IFL) match Thawhtanni zana khelhah he league-a Mizo team inlan pakhat zawk Chanmari FC chuan 2-1-in mualneitu Real Kashmir an hneh a, club 10 awmna league standing-ah hma sawnin pasarihna an luah chho.
Srinagar khelmual TRC Stadium inkhela goal hmahruai hi first half tawp dawn minute 43-a Marlon Rangel tihluh niin, half time-ah Aizawl team hian si khat faiin hma an hruai phawt.
Set-piece hun remchang an hmuh hmangtangkai thiam Chanmari tan Lalruatsanga’n second half tir lam minute 62-ah mikhual goal hnihna thawh ve lehin, tuibur hmuam da pawh tling loah Marius Bedzigui chuan free-kick atangin India hmar tawp team si phurh pakhat zawk sut then bawk mah se chak mamawh Mizo team-in goal dang an chhuah belh duh lo a, 2-1 hnehna an chang.
Kashmir vur rama an point thum hlawhchhuah hmangin Chanmari FC-in khelh sariha point riat hum chungin table-ah pasarihna an luah chho a; Snow Leopards erawh table mawngphahah an tang nghet sauh thung!
Kha inkhelah khan first half hun rei tak Real Kashmir lamin inkhel thunun zawk mah se thli a thaw nasa a, an midfielder-te tan forward chawm a harsa a, ball an pass fuh hlei thei lo!
Home team tan an captain Mohammad Inam khel tha viau mah se ani pawh hian goal thun kawnga an harsatna a sukiang zo bik lo.
Tarlan tawh angin, counter-attack hmanga hlauhawm siamchhuak thin Chanmari FC lam hian half-time dawnah set-piece an hlawhchhuak a, P. Christopher Kamei-a free-kick chhuih chu chuan Real Kashmir FC goalkeeper Sayad Bin chuan a khawih pha lo a, Player of the Match atana an thlan zui tak Marlon Rangel chuan mikhual hmahruaina goal a thun er zawk!
Mikhual goal hnihna pawh Real Kashmir tlarhnung luahtute’n set-piece an ven zawh loh atanga lut bawk niin, Kamei bawk chu he goal-ah pawh hian a bultumtu a ni leh a, a corner chhuih fuh lutuk atangin Ruatsanga’n Chanmari goal hnihna a sualchhuak.
Srinagar inkhelah khan Real Kashmir head coach Ishfaq Ahmed chuan an match khelh hnuhnungber atangin a lineup a siksawi a, goalkeeper Furkan Ahmad Dar aiah Sayad Bin Abdul Kadir luhtirin, midfield lamah Shahid Nazir chuan Ahteeb Ahmad Dar a thlak a, Habib Fofana nekchhuakin, Shedrack Charles pawhin starting line up a luah.
Chanmari FC head coach Dipankur Sharma pawhin Mizo club a enkawl hnua a game hnihnaah player pathum bawk thlakdanglamin, an match hnuhnungbera luh hmasak chang Kyle Degelman, Suanngaihmuana leh Emmanuel Badu-te aiah Lalruatsanga, F. Malsawmtluanga leh Joel Lalramengmawia-te a luhtir.
Chanmari FC hian kartawp Inrinni hian point 16 nei tling tawh chunga hmahruaitu ni mek Diamond Harbour an luhkhung leh dawn a; he mi ni vek hian point kua nena table-a pangana luahtu Aizawl FC pawhin table mawngphah chung chiah luahtu Dempo SC khelmual an lut ve bawk ang.