Indian men’s football boss thar Khalid Jamil

Indian men’s football boss thar Khalid Jamil
Rin lawk ang ngeiin Aizawl Football Club manager hlui Khalid Jamilm chuan Spaniard Manolo Marquez kalsan hmunruak luahin Indian national men’s football team head coach hna a chelh chho dawn ta a, nimin khan All India Football Federation (AIFF) executive committee chuan shortlist candidate pathum zing atangin an thlang fel ta a ni.
Tarlan tawh thin angin, thla hmasa mai khan India team chetthatpui zo lo Marquez leh AIFF thawhdunna a tawp a; Indian football-a coach hna sang ber hmunruak luah tura dilna thehluh hun chhung an hawnah khawvel hmun hrang hrang atangin dilna thahnem tak a lut a, chu’ng zing atang chuan legendary striker IM Vijayan-a kaihhruai AIFF Technical Committee chuan mi 10 an thlang chhuak phawt a, chu ta tangin mi pathum an thlang chhuak leh a, shortlist mi pathumte atangin AIFF ExCo-in thutlukna hnuhnung ber an siam ta a ni.
Mizo mipui tam takin kan hriat angin, Jamil hian kum 2017 khan rin loh takin budget nei sang lo tak Aizawl FC chu khatih laia Indian top flight I-League title a lakpui a, ram dang coach hnuaia thang khat lian chuang zet Indian national men’s football team a kun hnuah kum 13 chhunga a vawi khatna atan Indian coach-in Blue Tigers a kaihruai ve leh dawn ta a ni.
Kum 48-a upa Jamil hi India international hlui niin, India head coach ni tura thlan a nih lai pawh khan Indian Super League club Jamshedpur FC boss a la ni.
All India Football Federation ngaihtuah tura thehluh three-man shortlist zinga an hnawl tak coach pahnihte chu India head coach hlui Stephen Constantine leh Slovakia national team pawh lo enkawl tawh Stefan Tarkovic-te an ni.
Khalid Jamil lo lan hmaa Indian zinga national men’s team head coach ni thei hnuhnung ber chu Savio Medeira kha niin, kum 2011 atanga 2012 thleng team a enkawl a, a hnu lamah chuan AIFF-in foreigner ngar ngar a ruai a, sap coach Constantine-a hnuaiah India chu kang ve deuh bawk mah se India nunphung leh hawiher nena inmil tualchhung coach ngei rawih duhna a lian chho a, tunah Indian coach ngeiin national team a enkawl leh dawn ta a ni.
Nimina AIFF commiittee sang an thutkhawm zawha media a hmachhawnah AIFF President Kalyan Chaubey chuan AIFF ExCo-in head coach thar atana Khalid Jamil an thlan thu hi puangin, engtia rei nge an inrawih dawn tih erawh la ngaihtuah that leh tur a nih thu a sawi a, chu mi tur chuan amah nen an la inrawnho leh tur thu sawiin, a hlawh chungchang pawh la rel that tur a nih thu a tarlang tel.
Chaubey chuan, “Amah, Jamil hi chuan kum thum chhung atana contract ziah phawt a duh a, chutih laiin ExCo member thenkhat chuan kum khat emaw kum hnih emaw ni phawt se an duh a, engpawhnise, kan inrawih hun chhung hi long-term chu a ni rih phawt dawn a, kum hnih emaw kum thum emaw a ni mai thei, chetthat dana zir (performance-based) a ni ang chu,” a ti.
AIFF president hian an head coach thar Jamil chu club nena kawp mai mai ang chi ni loin full-time national team head coach ngei a nih tur thu leh eng club nen mah inzawmna a neih a rem tawh loh thu a sawi chiang nghal.
Jamil hma chiaha India boss Manolo khan kum khat India team a enkawl chhung khan club nen a kawp a, national team match khelh tur a awm loh laiin ISL club FC Goa a enkawl tel a, a hnuaiah India a ropui lo khawp mai!
Chanchinbumite’n head coach thar hming a puan rualin Chaubey hi zawhna an zawt nghal chat reng a, national team boss thar chuan club enkawl a nei zui zel dawn tho em tih zawhna chhangin AIFF president chuan, “Jamil hian national team head coach bak coach nihna dang a nei dawn lo,” tiin a chhang.
AIFF hian head coach hna dilna 170 zet a dawn zingah hming hraw tak tak pawh an awm ve fur a, chu’ng zingah chuan Liverpool star hlui pahnih Robbie Fowler leh Harry Kewell telin, hnawl zingah an tel!
Anni bakah hian Spanish coach hmingthang pahnih Pep Guardiola leh Xavi Hernandez hminga dilna pawh lut anga sawi thawm a richhuak chiam a, mahse, hei erawh chaw tak khuka khukpui chiam chi a ni chiah lo a ni mai thei!