Indian Wells-ah kum 44 mi Venus kan hmu leh dawn

Indian Wells-ah kum 44 mi Venus kan hmu leh dawn
A laizawn Serena nen an vanglaia hmeichhe tennis ti-boring thei khawpa boruak nei lian thin Venus Williams kha tunah chuan nula senior tak, kum 44 mi ni ve tawhin, a tal nat thinna Indian Wells-ah pawh WTA ranking lama a dinhmunin he tournament khel tur hian a pha lo a, mahse, wildcard hmanga inlan thei turin duhsakna pek a ni.
World number one hlui Venus tan thla thar Indian Wells tournament hi kum khat dawn hnua a match khelh leh hmasakber tur niin, nikum March thla Miami Open first round hnu lamah khan WTA Tour-level match a khel leh ta lo vang vang a, August 2023 kha Tour-level match a khelh tawpna a ni daih tawh avangin world ranking lamah pawh 974-na a ni duai tawh!
Kum 2001 final-ah khan a laizawn Serena Williams chuan Kim Clijsters hneh mah se fans boo khum a hlawh chiam a, kha mi tuma a nau an tih dan avang khan Venus hi a lawm lo a, kum 15 chhung teh meuh Indian Wells tournament a ‘boycott’ avangin tun hi Grand Slam-a vawi sarih champion tling tawh Williams tan tun hi Indian Wells-a a inlan vawi 10-na tur chiah a la ni!
Kha mi kum final-a Serena an boo chiam chhan kha Venus vang hi a tih theih a, semi-final match pakhat zawkah an unaua intum tur an nih laiin Venus hi inhliam chhuanlamin a inhnukdawk a, a laizawn Serena chuan last four match khel hah loin final-ah Belgian nula a tum theih phah a, kha kha Indian Wells mipuiin American mihang an auhnawmnah chiam chhan niin a lang!
Williams unau hringtu an pa ber Richard-a pawh a fanu an boo khum avang khan a lawm lo a, fans pungkhawmte kha a fanu vun rawng avanga khati anga khawsa ta niin a phu hial nghe nghe.
Serena pawh he tournament-ah hian a inlan duh lo reng a, kum 2015 khan kirleh chiahin, a kumlehah a u Venus pawh he tournament-ah hian a inlan chhunzawm ve leh ta a ni.
Thla thar Indian Wells khel tur hian two-time Wimbledon champion Petra Kvitova pawh wildcard pek zingah telin, kum 34 hian nikum July thla khan a fa hmasa ber hringin, tennis a chawlhsan vang vang hnuah tunthla tir lam khan khelmuala a kirleh tur thu a puang a, Indian Wells tournament buatsaihtute’n hmun an lo pe chhunzawm vat a ni.
Mipa lamah Brazilian rising star Joao Fonseca pawh wildcard hi pek ni ve bawkin, rawlthar kum 18-a upa hian Pathianni kalta mai khan an ram thenawm Argentina ramah a career-a a hmasaber ni turin ATP Tour title a hlawhchhuak a, Argentina Open champion thar hi tournament lian zawka a theihna kan thlir dawn a ni.
Kumin January thla Australian Open-a fourth round hial thleng pha American rawlthar kum 19 mi Learner Tien pawh wildcard hmangin Indian Wells-ah a inlan dawn.