Indiana Pacers in final an lut

Nilaini zing khan NBA Conference play-off semi-fnal khelh chhunzawm a ni a, Indiana Pacers in Cleveland Cavaliers an hneh nawn leh a, Eastren Conference final an lut. Nilai zinga inkhel dangah Oklahoma City Thunder in Denver Nuggets an hneh a, final an hnaih leh zual sauh bawk.
Series ah 3-1 a hmahruai mektu Indiana Pacers hian hnehna chan nawn leh ngei tumin Cleveland Cavaliers an hmachhawn. FInal lut turin chak mamawh mah se mikhual an nihna hmunah beisei angin bul an tan tha thei lova, quarter khatnaah point 12 ngawtin an hnufual nghal. Quarter hmasa berah bul tan tha lo mah se quarter hnihnaah an chetha hret a, point riatin an chungnung. An khingpuite nen an inkar tizim bawk mah se point li a hnufual zawk chungin chawlhlawk an hmang tho thung.
Chawlhlawk hnu lamah Pacers an khel tha chhunzawm a, quarter thumnaah tha taka khelin point 13 ngawtin an chungnung. Mualneitu Cleveland Cavaliers in quarter hnuhnung berah an khingpuite lehthal tumin tan khawh bawk mah se an hlawhtling zo lo. Quarter hnuhnung berah hian point 29 ve ve thawkchhuakin chak zawk an awm thei lo. Inkhel hmuhnawm takah hian point 114-105 in Indiana Pacers in hnehna an chang a, series-ah 4-1 in hma an hruai ta chiah a, Eastern Conference final an lut zui ta a ni.
Pacers hian final-ah Boston Celtics leh New York Knicks te inkhela chak zawk zawk an hmachhawn zui leh dawn. Celtics leh Knicks te hian game li an khel tawh a, Knicks in 3-1 in hma an hruai mek a, final lut turin vawi khat chak chiah an mamawh tawh.
Nilaini zinga inkhel dang; Western Conference semi-final thawh nganaah Oklahoma City Thunder chuan an khingpui Denver Nuggets chu point 112-105 in an hneh a, series ah 3-2 a hmahruaiin final an hnaih leh zual sauh bawk.
A tum thum nan Nuggets an hneh tumin Thunder tan Shai Gilgeous-Alexander chuan point 31 a thawkchhuak. Hetihlai hian Nuggets player pawimawh Nikola Jokic chuan point 44 lai a thawkchhuak a, ball sawhlet vawi 15 zeta dawng tling bawk. Jokic hi mimal takin chetha viau mah se Nuggets a chakpui zo lo thung. An tlawm leh tak vangin Nuggets tan final luh a harsa leh zual sauh a, final lut thei turin an tan tlawm a thiang tawh lo.