IndiGo a letin thlawh belh Thlai phurh tur tinzawn leh
Delhi leh Aizawl inkara service mek IndiGo chuan kar khata an thlawh mek zat chu a letin an tipung a. Mizoram thar thei leh thlai phurtu tur thlawhna pawh ngaihtuah dan zawn an sawi ri bawk.
Kumin January 4-a chief minister Lalduhoma leh Ministry of Civil Aviation thuneitu, secretary V Vualnam leh hetihlaia chief financial controller Vanlaldina Fanai te Delhi-a an inkawmnaa an ruahman angin, Inrinni khan Lengpui Airport-ah chief minister hian IndiGo thlawhna Delhi leh Aizawl inkara thlawk thin a leta tihpun (doubling of flights) thar chu a hawng.
State mamawhna hriatpui a, hetiang neih theih nana hma laksaktu Ministry of Civil Aviation leh IndiGo Airlines chungah an lawm tih chief minister hian a sawi a. Hei hian India ram laili leh Mizoram chu nasa lehzualin a inpawh tir dawn tih sawiin, “Official-te chetvelna atan, sumdawngten hmathar an lakna atan, phai lam pan ngai damlo tan leh zirlaite tan a tangkai em em dawn a. Khualzin tan tlawhpawh kan awlsam lehzual dawn a ni,” a ti.
Mizoram sawrkarin civil aviation hmasawnna lamah hma a la chho zel dawn tih a sawi a. Lengpui Airport chu a tul anga tuaihnum chhoh zel a ni dawn, tiin, Mizoram hmun thenkhatah heliports din a nih tur thu a sawi bawk.
IndiGo hian kar khatah thlawhna vawi 5 a thlawhtir thin chu vawi 10 ah a tipung dawn a. Nitina thlawk a awm bakah Nilaini, Zirtawpni leh Pathianniah vawihnih thlawk a awm dawn.
Hetianga IndiGo-in a thlawh zat a leta a tihpun chhan hi, kumin kumtir lama chief minister-in Ministry of Civil Aviation hotute hnena Delhi Mizoram House-a an inkawmnaah Aizawl thlawhna ticket man to lutuk tih tlawm nana thlawhna tam zawk thlawhtir a rawtna tihhlawhtlinna a ni.
IndiGo special director RK Singh, IAS (Rtd) chuan an hmalakna hian India ram laili leh Mizote inkarah inunauna tha zawk, inpawhna nghet zawk a siam an beisei tih a sawi a. Mizoram sawrkar hmalaknaah an lawm tih sawiin, Mizoramin thlai thar hralh tur a neih, thlawhnaa phurh chhuah theih dan tur pawh an dap anga, a hranin ruahmanna duan an tum tih a sawi a ni.