Indo-Bangladesh ramri kân ru 2,601 man
Indo-Bangladesh ramri kân ru 2,601 man
Union Minister Nityanand Rai chuan nikum khan Indo-Bangladesh ramriah Bangladesh khua leh tui 2,601 vel man an nih thu Thawhlehni khan Raja Sabha inkhawmah a sawi.
Thla 13 chhung (January, 2024 leh January, 2025)-a minister of state for home affairs-in Bangladeshi man zat a tar lanah nikum Augyst thlaa Bangladesh sorkar paih thlak a nih hnuah ramria man an tam zual hle tih a lang.
Rai-a hian parliament-ah hian Bangladesh atanga India lut zat leh eng angin nge sorkarin dan tuma hma a lak tih zawhna a chhang a ni.
August, 2024 leh January, 2025 inkarah ramriah mi 1,584 vel man an ni a, a hma thla ruk, February-July, 2024 inkarah chuan mi 879 man an ni a, 80.2% velin an pung a ni.
August 5, 2024 khan Bangladesh Prime Minister Sheikh Hasina-i chu paih thlak niin an ram a chhuahsan a. Nobel Prize lo dawng tawh, Muhammad Yunus-a chuan sorkar lailawk a kaihruai mek.
Hasina-i a tlanchhiat hnuah Bangladesh atang hian India-ah mi tam tak an lut a, a tam zawk hi sakhaw zuitu tlem zawk, an rama tihduhdah tawrh hlau nia sawi a ni.
Thla hmasaa ram pahniha ramri vengtu sipai hotute Delhi-a an inbiak pawh khan dan lova Indo-Bangladesh ramri kân chungchang hi an sawiho lian zinga mi a ni a. India leh Bangladesh hi ramri km 4,096.7 an intawm a, km 864.482 chu la hung loh a ni.
Ramri kân thinte ven nan hian vengtu tihchak lehzual a ni tih Rai chuan a sawi a. Tun lai hmanraw changkang zawka venna te, sipai dah belh leh hmanraw tha zawk hman thar pawh a tel tih a sawi.
“A thlithlaina tur hmanrua – Hand Held Thermal Imager (HHTI), Night Vision Device (NVD), UAV, CCTV/PTZ camera, IR sensor leh Comprehensive Integrated Border Management System (CIBMS) te hman a ni a. Patrolling, naka, duty post siam belh leh police leh Border Guard Bangladesh nena tangruala potrol pawh tih thin a ni,” a ti.
“Ramria hmun thim zual laiah floodlight leh solar light dah a ni a, lui awmna laiah pawh lawngleng leh BOP chhawp a ni bawk a. A hungna pawh hmun ralti zual laiah chuan tihchangkana ral atang pawha hriat theih tur ang chi hmanga thuam a ni,” tiin Rai-a chuan a sawi.