Indo-Israel ten venhimnaah thawhhona tha zawk siam dawn

Indo-Israel ten venhimnaah thawhhona tha zawk siam dawn
India leh Israel chuan ram venhimnaa hmasawnna, siamchhuah leh technology inthlunzawmna kawngah hma an la dawn a, free trade agreement siam tura hma an la dawn bawk tih India Prime Minister Narendra Modi-a’n a sawi.
Modi-a’n ni hnih chhung Israel a tlawhnaah ram pahnihten an inremna chi hrang hrang an siam zingah hei hi a tel a ni.
Ram pahnihte hian ‘horizon scanning’-ah an thawk dun dawn a, hei hian India ram thil pawimawh bika a theihna a tipung dawn niin India foreign ministry thuchhuah chuan a tar lang.
A huhova thil zir chian leh AI hmanrua hmanga hmathlir neih, thil hlauhawm lo awm thei laka lo inruahman lawk leh technology lama hmasawnna tura tihchakna kawngah a pui dawn niin Modi-a a sawi.
Israel chuan kum nga chhungin Indian inhlawh 50,000 vel an raah a luhtir dawn a, a bik takin thil siam chhuahna lamah a thawhtir dawn niin thuchhuahah a tar lang.
Modi-a chuan India chuan inrawnkhawmna a neih chhunzawm zel tur thu a sawi a, Asia khawthlang lama remna a awm theih nan thawhpui zawng zawngte nen thawhdunna a nei zel dawn tih a sawi bawk.
Israel Prime Minister Benjamin Netanyahu nena thuthar lakhawmtute an kawmnaah, “Gaza-a inremna ruahmanna hian remna kawng a hawng a, India chuan heng hmalaknate hi a thlawp tlat a ni,” tiin Gaza Strip-a buaina leh remna tura dapnaa India rilru a sawi.
Modi-a hian Iran a beih mai theih laia an hnai tuipui kama lawng sipai tam tak US-in a dah laiin Israel hi a tlawh a, ram pahnihte hian Tehran nuclear programme chungchangah inbiakna neiin rah tha a la chhuah thei rih lo.