Indo tihtawp loh chuan Trump-a’n tariff 100%-a tihsanah Russia vau

Indo tihtawp loh chuan Trump-a’n tariff 100%-a tihsanah Russia vau
US President Donald Trump-a chuan Nato kaltlangin US-in Ukraine hnenah ‘ralthuam tha ber ber’ a thawn dawn tih a sawi a, Russia chu ni 50 chhunga indo tihtawpna tur thuthlung a siam lo a nih chuan tariff sang tak laksakah a vau nghal.
“Ukraine hi a tih duh ang a tih theihna tur pek ngei kan tum a ni,” tiin Trump-a hian Nato chief Mark Rutte nen Washington-a an inkawm zawhah a sawi.
Rutte-a pawhin US hian ‘Nato kaltlangin Ukraine-in a mamawh ang ralthuam tam tham’ a pe dawn tih a sawi a, European-te chu chu an la sawiho ve dawn tih as awi bawk.
European ramte hian Kyiv hnenah hian Russia-in van sang atanga a kahna laka lo inven nana a hman ber, Patriot air defence systems an pe dawn a, hemi thlakna tur pawh hi US-in a tifel thuai dawn tih Trump-a chuan a sawi.
Rutte-a leh Trump-a hian eng hmanrua nge Kyiv hi an pek dawn sawi chiang lo mah se Rutte-a chuan ‘missile leh puak thei’ tih a sawi.
President Trump-a pawhin dollar tluklehdingawn tam tak man, Ukraine thlawp nana ‘rang taka indona muala sem darh tur ralthuam tha ber ber’ an pek dawn thu a sawi bawk.
“Vladimir Putin-a chu ni ila, vawiin hian Ukraine nena indawr ka duh lohna hi ka ngaihtuah tha ngei ang,” Rutte-a hian a sawi.
Tariff chungchangah Trump-a chuan ni 50 chhunga Ukraine neninremna a siam lo a nih chuan Russia nena sumdawnna la kalpui ramte lakah US chuan tariff 100%-a tihsan a tum thu a sawi bawk.
Hei hi a taka kalpui a nih chuan Russia nena sumdawnna lama la inzawm ramte chuan US-ah inhralh ve an duh a nih chuan tuna chhiah an chawi let an chawi a ngai dawn a ni.
India-in Russia tuialhthei a lei a, US company-ten Indian bungrua an lei duh a nih chuan lak luhnaah chhiah (import tax/tariff) 100% zeta sang an chawi a ngai dawn tihna a ni a. Chhiah a san chuan hralhna man a to zui dawn a, a aia man tlawm zawk lak luh a ni ang a, India-in a tuar dawn tihna a ni a. Hetiang zel hian ram dang, Moscow nena inzawmna la neite pawh tih zel an ni dawn tihna a ni.
Heti a nih chuan ram dangin Russia an dawr tlem phah dawn a, a tuialhthei pawh a hralh a harsa ang a, sum a siam chhuah tam loh miau chuan Ukraine nena indonaah pawh hman tur a tlachham thei dawn a ni.
Moscow sum hnar ber, a sum thawh chhuah hmun thuma thena hmun khat dawn hi tuialhthei leh boruakalhthei a hralhna a ni a. Thil a thawn chhuah 60% chuang hi heng thil pahnih hi a ni a, Trump-a’n tariff tihsana a vau hi a tak a thlen chuan an eibarin a tuar hle dawn a ni.
Tariff tihsan tum leh ralthuam pek chungchang hi a kimchang hriat theih a la ni lo va. Putin-a tan erawh nawrna na tak tling tura ngaih a ni.
Russia-in February, 2022 atanga Ukraine a rûn hnuah inremna leh inkahhai a la awm thei lo va. Vawi hnih inbiakna nei tawh mah se mi tang inthleng baka thui an la kal thei lo.
Kremlin chuan Trump-a thu sawi hi an la chhang lo va. Ukraine pawhin he chanchin ziah lai thleng hian aw-ka a la chhuah lo bawk.