Indonain Svitolina tha a tichak!

Indonain Svitolina tha a tichak!
Nikum October thla maiah fa a hring a, tun Thawhlehni zan khan top seed Iga Swiatek hnehin Wimbledon hmeichhe singles semi-final a lut a, Centre Court-a hnehna mak tak a chan hnuah Ukrainian Elina Svitolina chuan an ram lama indona kal mek chuan rilru lamah pau-khauhna a pe tih sawiin, rinkai zawk leh world number one ni lai a hneh theih chhanah Belarus thlawpnaa Russia-in an ram a run m>kna a kawk.
Thla thum liamta maia tour-a kirleh Svitolina hian last eight inkhel pakhatah 7-5 6-7 (5-7) 6-2-in champion tura rinkai zinga mi Pole Swiatek a barakhaih a, inkhelh ban court chhunga an kawmnaah a hnehna sualchhuah chuan a chipuite tan hlimna tlem-a-zawng a chhawpchhuahsak avanga a hlim thu leh indona chuan amahah thlirna dang a neihtir tih a sawi.
Ukrainian wildcard chuan, “Rilru lamah kan harsatna tawh mek hi chhiatna ang chuan ka ngai lo a, hringnuna thil chhe tak ni maiah ka ngai a, indona hian min tichak a, rilru lama paukhauhna min thlen a ni,” a ti.
World number three lai lo han hawlh pha ve tawh Elina hian thawm chhuah chunga amah thlawptu Centre Court mipui chungah lawmthu sawi nghalin, a career-a a tennis thaberte zinga mi a phawrhchhuah theih chhanah amah thlawptute a kawk a, an ram lama naupang te tein phone kaltlanga a inkhel lai an lo thlir thin chuan a thinlung a hneh hle tih a tarlang tel.
Kum 28 mi Ukrainian tan tun hi grand slam semi-final vawithum a luhna ni tawhin, kum 2019 nen All England Club bikah he stage a thlen vawihnihna a ni thung.
Thawhlehni zana a hnehna sual-chhuah avang khan WTA ranking thar lo chhuak leh turah kumin April thlaa inelna hmachhawn tan leh chiah Svitolina hian world number 76-na atangin top 30 a luah phak hmel a, a champion phei chuan chu aia sang chu a beisei thiang ang.
Chutiang mi chuan an ram leh inchhungkhur hun tawn avangin a khawvel thlir dan a danglam ta hlek tih sawiin, “Ranking-a a top lam han luah chhoh boruak chuan phurna nasa tak min thlen ngei mai a, mahse, fanu ka nei tawh a, indonain min chiahpiah reng bawk a, tunhmaa mi ni lo midang daih ka ni tawhin ka hria. Ka thil thlir dan pawh a dang ve ta deuh. Tunhma aiin ka cool ta zawk a,” a ti.
On court interview-a zawttunu chuan a fanuin hmalam pan zel turin a fuihin a tur ni tura a ngaih thu sawi chungin hnehna lian a chan ruala video call-a a fanu Skai-i’n a nu a hmuh dan boruak a zawhna chhangin: “A Ice cream kenin a rilru a la peng a ni mai thei a, in lamah chuan a dahpawi-mawh zingah ka tel pha lo,” tiin fiamthu a thawh zauh a, sawizawmin, “Ka chak leh chak loh ngaipawimawh tur kum a la ni lo,” a ti.
Hetih lai hian Ukrainian care em emtu pakhat a awm a, chu chu a tlawm zawka tang Swiatek kha niin, a tlawm hnu khan a thiannu chu Inrinnia a grand slam trophy hmasaber sualchhuak ngei turin duhsakna a hlan.
Polish top seed chuan, “Net-a kan inkuah lai khan a champion ngei ka beisei thu ka hrilh a ni,” a ti.
Ukraine leh Poland hi ram inthen-awm niin, Poland mite hi Ukrainian-te thlawptu leh an raltlante pawh nasa taka chhawmdawltute an ni a; Swiatek ngei pawh hian Russia-in an thenawm ram a run tirh phatah khan Ukraine a thlawp tih tawngka leh chetzia hmanga lantirin, Ukrainian flag rawng yellow and blue ribbon lukhum pawh a lo khum chhuak tawh thin a ni.
Svitolina leh Ukrainian player dangte pawh kumin Wimbledon leh tun nipui lai grass-court tournament hrang hrangah an inlan kal reng a, saprama an tennis pawl lian LTA leh Wimbledon thuthmun All England Club pawhin Ukraine mite hi an thlawp tlat a; tun nipui thawt lai hian an hmunhmaah khawsaktirin, an training-na tur hmanrua thlengin an tumsak hial a; nikum lamah phei kha chuan an hlohna leh tawrhna tur pawh pawisa zo loin Ukraine an thlawp-zia lantirna’n grass-court grand slam-a Russia leh Belarus player-te chhuah ve an khap hial a! Kuminah tel phalsak hram mah se an hming zawna an ram hming leh an hnam puanzar tarchhuah an la phal ta chuang lo fan!
Chumi chungchangah chuan Svitolina hian lawmthu sawi nghalin, “He Championships hian thlawpna extra min pe a, Ukrai-nian-te chunga England thiltih hi a mak zawk hial a, an theihna zawna min puihnaah hian lawm-thu kan sawi tawk thei ngai lo ang,”a tichhuak hial a ni.
Zanin The All England Lawn Tennis Club-a 2023 Wimbledon Championships semi-final pa-khat-ah Svitolina hian unseeded Czech Marketa Vondrousova a tum dawn a, chu hmun thleng tur chuan 2019 French Open runner-up Vondrousova hian quarter-final dangah American fourth seed Jessica Pegula a hneh.
Court One lamah kum 24 mi Vondrousova hian last eight-a a tumpui Pegula chu 6-4, 2-6, 6-4-in Thawh-lehni zan vek khan a hneh a, Open era chinah Zheng Jie (2008) leh Barbora Strycova (2019) tih loha seeded player thiau pali hneh chunga Wimbledon last four lut thei hmeichhe player awmchhun a ni.
42nd ranked Vondrousova laka tlawm ta Pegula tan quarter-final tahna thlentu a ni leh a, tun kha kum hnih chhunga grand slam last eight-a vawiruk a chak lohna ni tawhin, grand slam-ah last eight a la pel zo lo tluang zel!
Kum li liamta khan tleirawl mai ni chungin Vondrousova thungin Roland Garros final a lut nawlh tawh a, mahse, ani pawh hmasawn zawngin a kal thei bik lo a, tun hi kha mi hnua grand slam quarter-final a khelh leh vawikhatna chiah a la ni.