Indonesia Open-ah Lakshya leh Rajawat la dam

Star Indian shuttler Lakshya Sen leh a chipui Priyanshu Rajawat-te chuan Indonesia Open Super 1000 tournament kal mekah Thawhlehni khan an tumpui ve ve hnehin men’s singles second round an lut.
Jakarta khaw tournament-ah hian Lakshya chuan minute 40 chhungin Japanese Kenta Tsuneyama lakah 21-12, 21-17 hnehna a chang a; first round inkhel dangah Rajawat chuan world No. 6 leh a chipui HS Prannoy lakah 21-17, 21-12 hnehna a sualchhuak ve bawk.
French Open and All England Championship-a semi-final thleng pha Lakshya hian Olympic qualification nei fel tawhin, Indonesia ramah hian Japan player Kenta Nishimoto a hmachhawn leh ang. Nishimoto hian second round a luhna kawngah seventh seed Anthony Sinisuka Ginting of Indonesia chu 17-21, 21-11, 21-8-in a paltlang.
Rajawat hian second round-ah eighth seed Kunlavut Vitidsarn of Thailand a tum leh ang.
Kiran George tan erawh men’s singles event a tawp fel a, Hong Yang Weng of China lakah 21-11, 10-21, 20-22-in a tlawm.
Indian mixed doubles pair B Sumeeth Reddy leh Sikki Reddy pawhin round khatnaah 18-21, 21-16, 21-17-in American pair Vinson Chiu leh Jennie Gai an hneh a, top seeds Si Wei Zheng & Ya Qiong Huang of China leh Indonesian combination Rehan Naufal Kusharjanto & Lisa Ayu Kusumawati inkhela chak zawk zawk an tum leh ang.
Indian women’s doubles pair Treesa Jolly leh Gayatri Gopichand tangdun pawhin an opening round-ah Chinese Taipei pair Yu-Pei Cheng leh Yu Hsing Sun chu 21-15, 21-11-in an hneh ve bawk.
Indian combination hian an next round-ah seventh seeds Mayu Matsumoto leh Wakana Nagahara of Japan an tum leh dawn a ni.