Industrial state-a inhlang kai turin tumruhte pui dawn

Mizoram chu non- industrial state atanga industrial state-a inhlangkai turin thalai tumruh leh ti tak tak chu sawrkarin puih a huam tih chief minister Lalduhoma chuan a sawi.
Zuangtui Industrial Estate-a inbun FK Toughened Glass Factory hawnnaah chief minister chuan entreprenuer tha zarah ramin industry leh service sector lamah hma a sawn phah thin a. FK industry dintu Pu F Kapsanga pawh Mizo zinga entreprenuer tha ber pawl, kum 1960 chho atanga bul tana hmalam pan zel an ni tih a sawi.
Midang tam tak tana hna an siam bakah an thil siam chu Mizoramin a mamawh tak, state dang atanga lakluh harsa tak a ni hlawm tih sawiin, “Heng hlawhtling hmasate hi thalaiin entawnin tan la ula, non industrial state ni thin hi industrial state-a inhlangkai turin sawrkar chuan a pui dawn che u a ni,” a ti.Mizoram sawrkarin entreprenuer thate a ngaipawimawh a, mi tu pawh, ti tak leh tumruh, tanpui tlakte chu eng party-ah nge an awm tih a pawimawh loa, ti tak tak nih chiah a pawimawh tih chief minister hian a sawi.
Industries minister F Rodingliana chuan industry chu hna zahawm, hlawk leh ram tana tha si a nih avangin hnamdangte pawhin an zah thin tih a sawi a. Mizorama raw material awmsaa hma lak a tha ber, tiin, kawng thenkhatah state kan intodelh tan a, thawnchhuah lam hawi a hun chho tan tih a sawi a ni.
FK Toughened Glass Factory enkawltu F Lalmalsawma chuan darthlalang pangngai aia tha, a let sariha chak zawk, a keh palh pawha mihring tana hlauhawm loh tur a ni tih a sawi a. Mizoramin Assam atangin kan chah thin a, kan mamawh hunah a thleng hman lo fo, tiin, chumi harsatna sutkian nan chuan hma an la ta tih a sawi a ni.