Ineilo awm loin, tangrualin ke pen ang u – MPCC president

Party hruaitu inthlan an nei zo a, hunthar an kai a, inei lo awm loin, tangruala ke pen turin party mite a sawm tih Congress president Lal Thanzara chuan a sawi.
Zirtawpnia Congress Bhavan-a political session-ah MPCC office bearers thlan tharte charge an inhlan a. Executive member thlan tharte certificate hlan an ni.
MPCC president thar chuan felfai taka party inthlan an neih theih avangin Pathian hnenah leh party chhunga inthlan buaipuitu leh inthlan buaipui saktu returning officer leh polling official-te chungah a lawm hle tih a sawi a.
Campaign laia tawngkam duhthawh deuh, midang tana hriat nuam lo an tih a awm chuan theihnghilh sak turin a ngen a.
Congress party kalzelnaah finchhuah a, thurawn pe a, tawngtaipui reng turin a ngen tih sawiin, “Hmalam pana kan dinchhuah leh theih nan kan chunga mawhphurhna min pek hi tihhlawhtlinpui ngei turin hma kan la dawn a ni,” a ti.
OB inchuhnaa tling lo te pawh party hruaitute an la ni reng dawn a, an tanpuina an ngen tih sawiin, “Khawharin in awm loang tih ka tiam che u a ni,” a ti. Executive-a tling lo te pawh an vaiin party-a hmalaknaah thawhpui zel turin a ngen tih a sawi bawk.
MLA inthlanah an hlawhtlinpui loh avangin party mite ngaihdamna a dil tih Lal Thanzara hian a sawi a. India ramah nekchepna leh tihduhna nasa zelah kan ram leh hnam, kan sakhua chawikana humhim a nih theih nan Mizo mipui a sawm tih sawiin, MP inthlan turah Mizoram leh India ah Indian National Congress-in hlawhtlinna a chan ngei theih nan thawhho puiah mipui a sawm a ni.