Ingaihzawnnaah thil ni tura kan ngaih, ni si lo!

Inngaihzawn rei ve deuh tawh hnuah chuan kan lo inhrechiang telh telh a, tawngkam khat lek atang pawhin an lungawi leh lungawi loh te kan hre thei tawh mai thin. Hetiang hunah hian eng eng emaw thil ni tura ngaih ve ringawt hi kan nei awlsam tawh thin a, mahse, a tak ramah chuan miin eng nge an ngaihtuah a, eng nge an mamawh tih te hi hriatsak vek theih a ni lo. Chuvangin, inngaihzawnna emaw, nupa nunah emaw pawh ni se la, eng emaw ni tura ngaih leh ngaia neih tlat kan neih thin, ni si lo a awm thin niin relationship lama mithiam ten an sawi a, kan rawn tarlang e.
1. Hmathlir inang nei anga inngaih hi a awm duh khawp mai. I ngaihzawng emaw kawppui emaw nena hmathlir inang nei tlata inhriat kha nuam pawh i ti ang, mahse, mitinin mahni tawkin hmalam hun atana ruahhmanna leh hmathlir hi a hrang theuh kan nei thin a, kan inngaihzawn emaw, kan nupui/pasal emaw an nih avanga inang tura kan ngai ringawt thin hi a dik lo tih hriat tur a ni. I kawppui chuan eng nge a hmalam hun atana hmachhawp a neih tih chu zawt chhuak la, nang pawhin i hmathlir te hrilh la, chu chu in hmathlir a inan leh an loh hriat nan a tha ber. Hetihrual hian, inang nih duh lutukna avangin a hmathlir ang kha nangma hmathlir angah nei ve ringawt suh!
2. Inngaihzawnna leh nupa nunah hian hun harsa leh hun hlimawm kan paltlang vek a, kan hun paltlang chu a ngai reng thei lo va, a kual a kual ve thin a, a kual tur pawh a ni. Hetiang a nih lai hian kan inkar boruak chu a ngai reng tura ngaihna hi kan nei lian thin. Kan hlim a, hlim reng tura inngaihna te kan nei thin, mahse, chutiang chu a ni reng dawn lo tih hriat nawn fo tur a ni. Inngaihzawnna leh nupa nunah pawh kan inkar boruak hi a vir vel a, a kual ve reng a ni zawk. Hlim reng tura inngaihna i neih chuan, eng emaw harsatna in tawh hunah i tuar thiam lo ang. Chuvangin, boruak dang pawh tawk thei kan ni tih inhria a, chumi atana lo inrin ve reng a pawimawh.
3. Kan ngaihzawng leh kawppui te chu an rilru leh ngaihtuahna te hre thei a inngaih deuh rohna hi kan nei sam khawp mai. “Ka hrechiang tawh alawm,” tiin a ngaihtuahna thlenga hriatsak thei ang deuh reuhah te kan inngai thin. Kan kawppui te hrechiang nih hi kan chak thin a, a dik lohna pawh a awm chuang lo, mahse, a rilru leh ngaihtuahna te chu i hre tak tak lo tih hi inpawm hmak rawh. I hre duh tak tak a nih chuan, nangma tawka ngaihdan siam mai lovin amah kha zawt mai rawh!
4. I nun tikimtu niin i ngai a, a tel lo chuan engmah ti thei lo leh awm thei lo tura inngaihna te i nei thin, i engkima engkim niin i ngai thin. Kan kawppui te hi engkima min chhawmdawltu leh kan inrintawkna min siamsaktu an ni thei a, mahse, kan mamawh zawng zawng min tihsak theitu an ni lova, chutiang bawkin a mamawh zawng zawng kan tihsak thei bik lo. Keimahni chauhin kan awm thei lo va, midang kan mamawh- thian te, chhungte, thenrual tha te kan mamawh.