Inhal alh chunga bike khalh thui record siam

Inhal alh chunga bike khalh thui record siam
French pa huaisen, Jonathan Vero, kum 41, chu a taksa puma inhal alhin, motorcycle-in feet 1,450 a thui a tlan a, Guinness World Record a siam. Jonathan hi professional firefighter leh stuntman a ni bawk a, taksa pum alh chunga motorcycle khalh thui ber record a siam ta a ni.
Jonathan Vero hian a hma pawhin record dang a lo siam tawh a, oxygen hipna hmanraw dang hmang miah loin, a taksa alh vek chungin second 17 chhungin meter 100 a thui kein a tlan thleng hman a, record chi hnih- taksa alh vek chunga meter 100 tlan thleng rang thei ber leh taksa alh vek chunga oxygen hipna hmanraw dang hmang lo a tlan thui ber record (feet 893 leh inches 2.5) a siam.
Vero chuan, “Record hmasa pahnih ka siam khan kan taksa peng hrang hrang a kâng a, ka nawm loh phah khawp mai a, kar hnih vel zet chu ka bawksawp ve titih a, mahse, naupan lai atanga kan lo tuipui ve thin, record bu-a ka hming a chuang ve thei kha ka inchhuang khawp mai,” a ti.
Tun tuma record siam nan hian Yamaha DragStar 1100 motorcycle a hmang a, record hi Cote d’Or, France-ah a siam. Vero chuan, “He record siam tur hian bike ka tihdanglam deuh a ngai a, kang thei lo (fireproof) a siam a ngai a. Chumi hnuah taksa alh chunga motorcycle khalh ka zir leh bawk. Vanneihthlak takin record siam kan tum ni-ah khua a tha hlauh a, tlan kawng (track) pawh duhthusam a ni a, chuvangin ka inzir angin ka che thei ta a ni,” a ti.